1-qazan künı Almatyda bır top qyzmetkerler men qoǧam belsendılerı Qarttar künı merekesın paidalana otyryp, äleumettık kömekke mūqtaj qariialardyŋ otbasyna qaiyrymdylyq kömek körsettı. Almaty qalasy Qylmystyq atqaru jüiesı Türkısıb audandyq bölımı, jergılıktı polisiia bölımşesı jäne «Mäŋgılık Qazaqstan» qoǧamdyq qorynyŋ qyzmetkerlerı bırınşı ardager İdris Ramzaevtyŋ şaŋyraǧyna bas sūqty. Ol tösek tartyp jatqanyna qaramastan, qonaqtardy jyly qarsy aldy. «Er jıgıtıŋ basyna ne kelıp, ne ketpeidı» demekşı, bır kezderı ıstı bolyp, taǧdyrdyŋ tälkegıne ūşyrap, türmede ūzaq jyl jazasyn ötegen Ramzaev bügınde Türkısıb audandyq probasiia qyzmetınıŋ esebınde tūr. Oǧan jylda qalalyq qylmystyq atqaru jüiesı departamentı tarapynan türlı qūqyqtyq-sottyq kömekter körsetılıp keledı.
Amandyq-saulyq sūrasyp, az-kem äŋgıme-düken qūrǧannan soŋ, Ramzaevqa azyq-tülık qorjyny tabys etıldı. «Almaty qalasy Qoǧamdyq damu basqarmasy biyl bas bostandyǧynan aiyru oryndarynda jazasyn ötep şyqqan azamattarmen jūmys ısteudı bızge tapsyrǧan edı. Sol joba aiasynda türmeden şyqqan adamdarǧa psihologiialyq-äleumettık järdem körsetu jükteldı. Osy kömektıŋ bır aiǧaǧy retınde bız bügın sızge azyn-aulaq materialdyq tūrmystyq qoldau körsetkımız keledı», dedı «Mäŋgılık Qazaqstan» qoǧamdyq qorynyŋ joba jetekşısı B.Nälıbaev. Öz kezegınde Ramzaev qol ūşyn sozǧan delegasiiaǧa alǧysyn jaudyrdy. «Bızdı ūmytpai, elep-eskerıp, köŋılımdı sūrai kelgenderıŋızge myŋ da bır rahmet. Kömektıŋ ülken-kışısı bolmaidy. Sızderdıŋ tittei järdemderıŋız bızdıŋ tūrmysymyzdy ūzaq uaqytqa jeŋıldetedı. Maǧan jasaǧan qaiyrymdylyq kömekterıŋız özderıŋızge eselenıp qaitsyn. Isterıŋızge tek qana sättılık tıleimın», dep aǧynan jaryldy İdris aqsaqal.
Türkısıb audanynda tūratyn taǧy bır qart azamat – Sergei Moriakovtyŋ üiı Ramzaevtyŋ üiınen alys emes. Sondyqtan ūiymdastyruşylardyŋ azyq-tülık qorjyndary tielgen kölıkterı köp ūzamai onyŋ üiıne at basyn tıredı. Sergei anasymen bırge tūrady eken. Olar audandyq probasiia qyzmetınıŋ inspektorlaryn jaqyn adamdaryndai qarsy alyp, qalǧan qonaqtarmen de jeke-jeke tanysty. Alǧaşqy bolyp söz alǧan inspektor Tūrsynai Autova qarttardy qūrmetteu tek 1-qazan künımen şektelmeitının airyqşa atap öttı. «Qarttar – bızdıŋ qazynamyz. Sızderge qanşa kömek körsetsek te, sızderdıŋ qoǧamǧa sıŋırgen eŋbekterıŋızdıŋ ötemın qaitara almaimyz. Ükımettık emes ūiymdarmen tıze qosa otyryp jasaǧan osy kömegımızdı qabyl alyŋyzdar» dep ol azyq-tülık qorjynyn üi ielerıne ūsyndy.
Alpys jasty alqymdaǧan Sergei Moriakov jasy kelse de, qaladaǧy zauyttardyŋ bırınde jūmys ısteidı. Onyŋ ükımetke alǧysy şeksız. «Memleket bızdı esten şyǧarmai, sızderdei azamattardy jiı-jiı jıberıp, qoldarynan kelgenşe kömekterın körsetıp tūrady», dep Sergei rizaşylyǧyn jasyrmady.
Aita ketu kerek, qaiyrymdylyq ıs-şarasyna joǧaryda atalǧan qyzmetkerlermen qatar Türkısıb audandyq probasiia qyzmetınıŋ basşysy M.Aqsaqalov, Türkısıb audandyq jergılıktı polisiia qyzmetkerı, aǧa leitenant E.Bauyrjanūly, probasiia qyzmetınıŋ inspektory G.Mūstafaeva qatysty.
N.Nauryzäliev
