Keşe senat spikerı M.Äşımbaev M.Tazabekovtı qabyldap, halyqtyŋ jaiyn talqylap, “egemen elımızde dınaralyq tatulyq pen qoǧamdyq kelısımdı nyǧaituǧa, ūlttyq qūndylyqtarymyzdy därıpteuge jäne halqymyzdyŋ bereke-bırlıgın arttyruǧa zor üles qosyp jürgenı üşın Mūhamedjan Tazabektı alǧys hatpen marapattapty”.
Alǧys hattyŋ mazmūnyna süiensek, qazır M.Tazabekov kem degende 3 salada zor üles qosyp jür eken. Emosiiasyz ärqaisysyna jeke-jeke toqtalyp köreiık.
Bırınşı — dınaralyq tatulyq pen qoǧamdyq kelısımdı nyǧaituǧa qosqan ZOR ülesı. M.Tazabektıŋ dınaralyq tatulyq pen qoǧamdyq kelısımdı nyǧaituǧa qosqan ZOR ülesın qalai ölşeimız? İnstagramdaǧy auditoriiasy jäne posttarynyŋ laik sanymen be? “Tälım trend” atty uaǧyzdar seriiasynyŋ tyndauşylar sanymen be? N.Nazarbaevty basyna köterıp maqtaityn sözderı sanymen be? Şen-şekpendılerdıŋ qolynan alǧan alǧys hattary jäne olarmen bırge tüsken suretter sanymen be?
Ekınşı — ūlttyq qūndylyqtarymyzdy därıpteuge qosqan ZOR ülesı. Ras, M.Tazabekov patşaǧa baǧynu men köp äiel aludy uaǧyzdaumen, seksologiiamen ainalysqanǧa deiın aitys aqyny retınde köpşılıktıŋ yqylasyna bölendı. Sol arqyly aitysty nasihattauǧa üles qosty. Sol kezeŋde memleketten talai syi-siiapatyn aldy. Keiıngı jyldary Tazabekovtıŋ aitysqa qatyspaitynyn, aitystyŋ Nūr Otannyŋ propaganda proektısıne ainalyp ketkenın eskersek, onda Tazabekov ūlttyq qūndylyqtarymyzdy därıpteuge qalai üles qosyp jür? Onyŋ keiıngı uaqyttaǧy ıs-äreketı ūlttyq qūndylyqtardy därıpteuden görı ūlttyq qūndylyqtardy jamylu arqyly el-jūrtqa şükır men tobany nasihattauǧa, rejimge qyzmet etuge, zombilerdıŋ sanyn arttyruǧa köbırek ūqsaidy.
Üşınşı — halqymyzdyŋ bereke-bırlıgın arttyruǧa qosqan ZOR ülesı. Poliseilerdı beibıt mitingıge şyqqan qazaqstandyqtardyŋ qūiymşaǧynan teuıp, “prikazdy oryndauǧa” şaqyryp, aşyqtan aşyq azamattarǧa küş körsetuge ügıtteitın adamdy “halqymyzdyŋ bereke-bırlıgın arttyruǧa ZOR üles qosyp jür” dep qalai aitamyz? Al Tazabekovke alǧys hat bergen M.Äşımbaev myrza basqaşa oilaityn siiaqty.
Eske sala keteiın, QR Konstitusiiasy boiynşa M.Äşımbaev memlekettegı №2 adam. Osyǧan deiın M.Tazabekovtı konstitusiia boiynşa eldegı №3 adam N.Nyǧmatulin qabyldaǧan. Endı konstitusiia boiynşa eldegı №1 adam Q.Toqaev jäne Qazaqstandaǧy №01 adam N.Nazarbaevtyŋ Tazabekovtı qabyldap, alǧys hat tabystauy qaldy. Tazabekov general aǧasy Qairekeŋnıŋ batasy men B.Tıleuhannyŋ dūǧasy arqasynda ol künge de jeter. İnşallah!
P.S. Saiasatta tanymal adamdardyŋ köpşılık aldynda bır-bırıne qoldau körsetuı jaidan-jai jasalmaidy. Bır tūlǧanyŋ ekınşı tūlǧaǧa aşyq qoldau bıldıruı (endorsement) “Men onyŋ qūndylyqtaryn qoldaimyn, onyŋ oiymen, ıs-äreketımen kelısemın” degendı bıldıredı. Mäselen, AQŞ-ta jaqynda ötetın prezident sailauy aldynda respublikalyq partiianyŋ müşesı bolǧan marqūm Djon Makkeinnıŋ jesırı Sindi Makkein jäne bırneşe respublikalyqtar Trampty emes demokrat Baidendı qoldap şyqty. Būl — respublikalyqtar üşın de, sailauşylar üşın de ülken signal.
Al avtoritarlyq Qazaqstanda saiasatkerlerdıŋ M.Tazabekov sekıldı propagandisterdı jeke qabyldap, alǧysyn bıldırıp, aşyq qoldau körsetuı “rejimge jasap jürgen eŋbegıŋdı baǧalaimyn” degenge keledı. Būl — qoǧam üşın qauıptı signal.
