Ministr «dıni nasihatqa» qatysty ne aitty?

Mädeniet jäne sport ministrı Aqtoty Raiymqūlova änşı Möldır Äuelbekovanyŋ «dıni nasihatyna» qatysty pıkır bıldırdı dep habarlaidy «Adyrna» ūlttyq portaly sputnik.kz agenttıgıne sılteme jasap. Ortalyq kommunikasiialar qyzmetınde ötken onlain brifingte tılşıler Möldır Äuelbekovanyŋ dıni äŋgıme aituyna bailanysty sūraq qoidy. «Qazırgı kezde tanymal adamdar äleumettık jelıde özınıŋ dıni közqarasyn aşyq aityp jür. Olardyŋ ışınde «Qazaqkonserttıŋ» qyzmetkerlerı de bar. Mäselen, Möldır Äuelbekova bır postynda mektepke baratyn qyzdarǧa basyn jauyp baruǧa bolatynyn jazǧan. Sony özı de qoldaidy. Örkeniettı elde memlekettık käsıporyn qyzmetkerınıŋ osyndai nasihat jürgızgenı dūrys pa?» – dedı jurnalister. Mädeniet jäne sport ministrı Aqtoty Raiymqūlova änşı obrazynyŋ özgergenın baiqaǧan. Osy oraida ol örkeniettı eldıŋ erejelerın saqtau qajettıgın jetkızdı. Möldır Äuelbekova jaqynda ǧana tūrmysqa şyqqanyn atap ötken ministr, onyŋ tüsken şaŋyraǧyndaǧy dıni ūstanymǧa bailanysty ol obrazyn bırşama özgertken boluy mümkın ekenın eske saldy. «Ärine, onymen ǧana emes, mädeniet salasynyŋ basqa da qyzmetkerlerımen ünemı tüsındıru jūmystary jürgızıledı. Sebebı olar – tanymal adamdar. Olardyŋ sözıne milliondaǧan adam qūlaq asady. İä, öz pıkırın bıldıre alady, bıraq būl onyŋ jūmys ısteitın uäkılettı organnyŋ nemese ūiymnyŋ resmi közqarasy bolyp sanalmaidy», – dedı Raiymqūlova. Ministr halyqtyŋ nazarynda jürgen adamdardy örkeniettı eldıŋ erejelerın ūstauǧa ündedı. Aita keteiık, änşı Möldır Äuelbekova karantin uaqytynda ekınşı ret tūrmysqa şyqqan bolatyn. «Al, halqym! Qasiettı Ramazan aiynda Allanyŋ qalauymen ekı dürkın oramaldy boldym! Älhamdulilliah! Qūtty bolsyn!», – dep jazdy ol öz paraqşasynda. Änşı toidan keiın oramal taǧa bastady. Sol üşın qalyŋ köpşılıktıŋ synyna da ūşyrady.