Mınıstr «dinı nasıhatqa» qatysty ne aıtty?

3016
Adyrna.kz Telegram

Mádenıet jáne sport mınıstri Aqtoty Raıymqulova ánshi Móldir Áýelbekovanyń «dinı nasıhatyna» qatysty pikir bildirdi dep habarlaıdy «Adyrna» ulttyq portaly sputnik.kz agenttigine silteme jasap.

Ortalyq kommýnıkaııalar qyzmetinde ótken onlaın brıfıngte tilshiler Móldir Áýelbekovanyń dinı áńgime aıtýyna baılanysty suraq qoıdy.

«Qazirgi kezde tanymal adamdar áleýmettik jelide óziniń dinı kózqarasyn ashyq aıtyp júr. Olardyń ishinde «Qazaqkonerttiń» qyzmetkerleri de bar. Máselen, Móldir Áýelbekova bir postynda mektepke baratyn qyzdarǵa basyn jaýyp barýǵa bolatynyn jazǵan. Sony ózi de qoldaıdy. Órkenıetti elde memlekettik kásiporyn qyzmetkeriniń osyndaı nasıhat júrgizgeni durys pa?» – dedi jýrnalıster.

Mádenıet jáne sport mınıstri Aqtoty Raıymqulova ánshi obrazynyń ózgergenin baıqaǵan. Osy oraıda ol órkenıetti eldiń erejelerin saqtaý qajettigin jetkizdi.

Móldir Áýelbekova jaqynda ǵana turmysqa shyqqanyn atap ótken mınıstr, onyń túsken shańyraǵyndaǵy dinı ustanymǵa baılanysty ol obrazyn birshama ózgertken bolýy múmkin ekenin eske saldy.

«Árıne, onymen ǵana emes, mádenıet salasynyń basqa da qyzmetkerlerimen únemi túsindirý jumystary júrgiziledi. Sebebi olar – tanymal adamdar. Olardyń sózine mıllıondaǵan adam qulaq asady. Iá, óz pikirin bildire alady, biraq bul onyń jumys isteıtin ýákiletti organnyń nemese uıymnyń resmı kózqarasy bolyp sanalmaıdy», – dedi Raıymqulova.

Mınıstr halyqtyń nazarynda júrgen adamdardy órkenıetti eldiń erejelerin ustaýǵa úndedi.

Aıta keteıik, ánshi Móldir Áýelbekova karantın ýaqytynda ekinshi ret turmysqa shyqqan bolatyn.

«Al, halqym! Qasıetti Ramazan aıynda Allanyń qalaýymen eki dúrkin oramaldy boldym! Álhamdýlıllıah! Qutty bolsyn!», – dep jazdy ol óz paraqshasynda.

Ánshi toıdan keıin oramal taǵa bastady. Sol úshin qalyń kópshiliktiń synyna da ushyrady.

Pikirler