Mekteptiń quny – 1 teńge

3276
Adyrna.kz Telegram

Soltústik Qazaqstan oblysynda qaraýsyz, bos qalǵan mektepter aýkıonǵa shyǵarylyp, satylymǵa qoıylǵan. Bul týraly petropavlovsk.news saıty habarlady dep jazady Baq.kz.

SQO Jambyl aýdany Úlgi aýylyndaǵy mektep quny - 3,7 mln teńgege baǵalanǵan. Degenmen aýkıonnyń sharty boıynsha eń tómengi baǵasy – 1 teńge.

Úlgi aýylynda mektepke baratyn bala joq. Bul aýylda qazirgi kezde 18 adam turady. Osydan 10 jyl buryn 235 adam turǵan eken. Al aýyldyń tynysy tarylmaı, qaınap turǵan ýaqytta 400-deı adam turǵan.

Aýkıon 10 qarashaǵa belgilengen eken.

Qujat boıynsha mektep 1972 jyly salynǵan, aýmaǵy 471 sharshy metrdi quraıdy. Ǵımarattyń jaǵdaıyna qarap, 3,7 mln teńgege baǵalanǵan eken. Qańyrap qalǵan aýylda eshkim bolmaǵandyqtan, mundaı baǵaǵa satyp alýshy bolmaı tur. Sarapshylar aýkıon sharty boıynsha saýda-sattyq tym tómendegen jaǵdaıda, mektepti bir teńgege satyp alýǵa bolady deıdi.

Buǵan uqsas jaǵdaı Jambyl aýdany Rojdestvenka aýylynda da bar.

Munda aýmaǵy 1264 sharshy metrdi quraıtyn, 2 qabatty mektep aýkıonǵa qoıylǵan. Onyń smetalyq quny - 9,4 mln teńge, eń tómengi baǵa – 1 teńge. Qazir bul aýylda 13 adam turady. Ótken jyly 44 adam turǵan eken. 20 jyl buryn 372 turǵyny bar aýyl bolǵan.

Ary qaraı tizim boıynsha, Aqbalyq aýylyndaǵy eki qabytty mektep. Aýmaǵy 562 sharshy metr. Bastapqy baǵa - 1,7 mln teńge. Eń tómengi baǵa – «kók tıyn». Aýkıon 10 qarasha kúni ótedi dep josparlanǵan. 2018 jyly bul aýyl taratylyp jiberilgen (joıylǵan).

Osydan 20 jyl buryn 260 turǵyny bar qaınaǵan aýyl bolǵan.

Esil aýdany Novoýzenko aýylynda aýmaǵy 3327 sharshy metrdi quraıtyn 3 qabatty mektep satylymǵa shyǵarylǵan. Quny - 27,2 mln teńge, eń tómengi quny  - 1 teńge. Mektep 1983 jyly salynǵan, ol kezde aýylda 950 adam turǵan. Qazir aýylda 30 adam turady. Eń basty problemalardyń biri – aýyz sýdyń bolmaýy. Aýyl turǵandary sýdy kórshi aýyldan tasyp ishedi.

Statıstıka komıtetiniń málimetteri boıynsha, sońǵy onjyldyqta Soltústik Qazaqstan oblysynda mektepterdiń jalpy sany 127-ge azaıǵan. Al bastaýysh jáne orta mektepterdegi oqýshylardyń jalpy sany segiz myń adamǵa tómendegen.

Jalpy alǵanda, sońǵy 20 jylda Soltústik Qazaqstan oblysynda 302 mektep jabyldy (478 qaldy). Al oqýshylar sany 135,2 myńnan 78 myńǵa deıin azaıdy.

Foto derekkózden alyndy.

Pikirler