Bügın aqparattyq-kommunikasiialyq ortalyǧynda «Saq» kinostudiiasy men «Şymkent-Sirk» Memlekettık kommunaldyq qazynalyq käsıporny bırlesıp tüsıretın «Manej» serialynyŋ alǧaşqy körsetılımı boiynşa brifing öttı.
Baspasöz mäjılısınde «Şymkent-Sirk» MKQK-nıŋ direktory Arman Aliev serialdyŋ maqsatyn jetkızdı.
– Serialdy tüsırudegı negızgı maqsat – sirk önerın nasihattap, onyŋ qanşalyqty kürdelı sala ekenın körsetu. Filmde ärtısterdıŋ tökken terı, ǧajaiyptar qūpiiasy jäne erekşe baǧdarlamalary körsetıledı. Osy rette körermen respublikadaǧy üşınşı käsıbi sirktıŋ qūryluyn, qalyptasuyn, sondai-aq jastardy sirkke bauludy jäne aŋdarmen jūmys jasau önerı sekıldı qyzyqty oqiǧalardy tamaşalaidy. Būl serial – elımızdegı alǧaşqy joba, iaǧni, mūny Şymkenttıŋ brendı retınde qabyldauǧa bolady, – dedı Arman Mahmūtūly.
İdeia avtory Şymkent qalasy «SAQ» kinostudiiasynyŋ rejisserı Batyrhan Däurenbekovtıŋ aituynşa, bastapqyda 25 minuttan tūratyn 10 bölımı tüsırılmek. Eger serial körermenderdı qyzyqtyryp jatsa, jalǧastyrylady. Al «SAQ» kinostudiiasynyŋ direktory Nuriddin Patteevtıŋ sözınşe, atalǧan film kinostudiianyŋ öz qarjysyna tüsırılude. Osy jyldyŋ soŋyna deiın ekı seriiasyn jaryqqa şyǧaru josparlanyp otyr.
Aita keteiık, qos şyǧarmaşylyq ūjym bırlese otyryp, sirktıŋ kündelıktı tynys-tırşılıgın körsetetın tanymdyq būl körkem film Qazaq memlekettık sirkınıŋ 50 jyldyǧyna arnalady. Mūndaǧy siujetter «Şymkent-Sirkte» jäne qalanyŋ körıktı jerlerınde tüsırıledı.
Şymkent aqparattyq-kommunikasiialyq ortalyǧy
Foto – Serık Qosai
