Şymkent qalasynyŋ äkımı Mūrat Äitenov Äl-Farabi audanyn aralap, ondaǧy qordalanǧan mäselelermen tanysty.
Atap aitqanda, dendrosaiabaq aumaǧyndaǧy qarausyz qalǧan balalar temır jol stansiiasyna bardy. Ondaǧy jaǧdaimen tanysqan şahar basşysy nysandy halyq igılıgıne berudıŋ joldaryn qarastyrudy tapsyrdy.
Mūnan keiın audan aumaǧyndaǧy kanaldardy aralap kördı. Aqbastau kanaly arnasynyŋ 535 metr aumaǧyn betondasa, sol maŋaida tūratyn tūrǧyndar egınşılıktı qolǧa alatyndaryn aituda. Mūrat Äitenov atalǧan jūmystarǧa biudjetten qarjy böludı qarastyru qajettıgın aitty.
Odan özge, Tekesu tūrǧyn alabyndaǧy mäselelermen tanysty. Tūrǧyn alap tūrǧyndary biyl sapaly auyzsumen qamtamasyz etıletın boldy. Qala äkımımen jolyqqan tūrǧyndar mektep salyp beru jönındegı öz ötınışterın de jetkızdı. Ötınış negızınde qala basşysy jauapty basqarma basşylaryna balabaqşa men mektep jobasyn daiyndaudy jüktedı.
Al, Säule şaǧyn audanyndaǧy 276 oramdy injenerlık-infraqūrylymmen qamtamasyz etu kezeŋ-kezeŋımen jürgızule. Oramdy elektr jüiesımen qamtamasyz etu maqsatynda, demeuşıler tarapynan 25 baǧana, 2 şaqyrym symdar jäne qūattylyǧy 160 kVt köteretın transformator ornatylǧan. Bügıngı künge 150-ge juyq jeke tūrǧyn üi elektr quatymen qamtamasyz etılude. Odan bölek, joǧaryda atalǧan aumaqty sapaly auyz sumen qamtamasyz etu üşın, demeuşıler tarapynan 350 metrge juyq su qūbyrynyŋ qazba jūmystary jürgızılıp, auyz su jüiesı tūrǧyndardyŋ igılıgıne paidalanuǧa berılgen.
Qala basşysy özınıŋ jıtı baqylauyna alǧan şalǧaida onalasqan 195 oramǧa da bardy. Mūnda «Omega Stroi» JŞS tarapynan 10/0,4 kV elektr jelılerınıŋ qūrylys-montaj jūmystary tolyǧymen aiaqtalyp, tūrǧyndardyŋ igılıgıne berıldı. Auyz su jäne tabiǧi gazben qamtu mäselesı jyl soŋyna deiın şeşımın tabatyn boldy.
Şymkent qalasy äkımınıŋ baspasöz qyzmetı
