Teatr ūjymy qazaqstandyqtardy ındet qaupınen saqtanuǧa şaqyrdy

Ǧ. Müsırepov atyndaǧy qazaq memlekettık akademiialyq balalar men jasöspırımder teatry ındet qaupınen saqtanyp, qiyn kezeŋde tüsınıstık pen bırlık tanytuǧa şaqyrdy. Teatr akterlery osyǧan orai videorolik tüsırgen, dep habarlaidy QazAqparat tılşısı. «Dert köp. Densaulyq bıreu», «Auyryp em ızdegenşe auyrmaityn jol ızde», «Bızdıŋ basty bailyǧymyz – ol myqty densaulyǧymyz», «Dos-jaran auyryp qalǧanda selsoq jürersıŋ, älekke auru salǧanda qadırın jannyŋ bılersıŋ», «Auru batpandap kırıp, mysqyldap şyǧady» dep halyqqa ündeu tastaǧan teatr akterlary ındet qaitadan örşitındei sipat tanytyp kele jatqanyn eskerttı. Ärıptesterınıŋ sözın qoldaǧan teatr direktory Azamat Satybaldy üş närsenıŋ, daudyŋ, jaudyŋ jäne qaitadan qozǧan aurudyŋ aldyn alu kerektıgın aitty. «Asa qadırlı aǧaiyn! Qazaqta «auyryp em ızdegenşe auyrmaityn jol ızde» degen söz bar. Auru aityp kelmeidı. Qazır elımızdıŋ basynda ötıp jatqan ındet bärımızge syn. Äiteuır aman-esen bırınşısınen öttık. İä, qiyndyqtar men qazalar boldy. Jaqyndarymyzdan aiyryldyq. Ol endı Allanyŋ ämırı. Eşkım qarsy kele almaidy. Dese de, «saqtansaŋ saqtaidy» deidı atam qazaq. Al endı qazır jaŋalyqtardan pandemiianyŋ qaitadan küşıne engenın körıp jatyrsyzdar. Osy ındetten aman-esen şyǧaiyq. Ol üşın saqtyq qana kerek. Köp adam şoǧyrlanǧan jerge barmai, tıptı özıŋdı ǧana emes, özgenı de auyrtpauyŋ kerek. Sol üşın ärbır adam būǧan jauapkerşılıkpen qarauy tiıs. Men barşa körermendı, aǧaiyn-tuysty, eldı, jūrtty saqtanuǧa şaqyramyn. Saqtyq şaralaryn ūstanyŋyzdar. Bırıkkende, bır bolǧanda, bır jaǧadan bas, bır jeŋnen qol şyǧarǧanda ǧana jeŋemız. Sol üşın barşaŋyzdy saqtyq şaralaryn saqtap, aman-esen boluyŋyzdy tıleimın. Elımız aman, jūrtymyz tynyş bolǧai», - deidı Azamat Satybaldy.