Qazaqstannan gumanitarlyq kömek retınde jıberılgen medisinalyq būiymdar men jabdyqtar bügın Bışkekke jetkızıldı,dep habarlaidy «Adyrna» ūlttyq portaly İndustriia jäne infraqūrylymdyq damu ministrlıgıne sılteme jasap.
Onyŋ qūramynda «Tynys» AQ-da öndırılgen «Kökşetau-4P» ökpenı jasandy jeldetu mobildı apparattarynyŋ 400 danasy jäne Almatydaǧy «Dolce pharm» JŞS jäne Jambyl oblysynda ornalasqan «Mega pharm» JŞS şyǧarǧan 2 mln. medisinalyq betperde bar.
Gumanitarlyq kömek Qazaqstan Respublikasynyŋ Prezidentı Qasym-Jomart Toqaevtyŋ tapsyrmasyna sai körsetıldı.
Jıberılgen gumanitarlyq jüktıŋ jalpy qūny 400 mln. teŋgege juyq. QR Ükımetınıŋ qaulysyna säikes aksiiany Qazaqstan Respublikasynyŋ İndustriia jäne infraqūrylymdyq damu ministrlıgı ūiymdastyrdy. Jüktı Qyrǧyzstan Densaulyq saqtau ministrlıgınıŋ mamandary qabyldap aldy.
«Adyrna» ūlttyq portaly
