"Vernyi kapital" kompaniialar toby Mūhtar Äbliazovtyŋ qazaqstandyq oligarh "Bolat Ötemūratovtyŋ qamalǧany jäne onyŋ üstınen Angliia sotyna şaǧym tüskenı" jaily jazbasyn joqqa şyǧardy.
Bır kün būryn quǧyndaǧy biznesmen Mūhtar Äbliazov Facebook paraqşasynda bırınşı prezident Nūrsūltan Nazarbaevtyŋ būrynǧy ıs basqaruşysy ärı kömekşısı Bolat Ötemūratovtyŋ "ūstalyp, elden şyǧuyna tyiym salynǧanyn" jazǧan edı.
"İnformbiuro" saitynyŋ jazuynşa, "Vernyi kapital" baspasöz qyzmetı kompaniianyŋ basty aksionerı Bolat Ötemūratovtyŋ ūstalǧanyn terıstep, onyŋ Nūr-Sūltanda "qoǧamdyq ıstermen şūǧyldanyp jürgenın" aitqan.
Degenmen kompaniia Ötemūratovtyŋ "BTA Bank" şaǧymy boiynşa London sotynda jauapker ekenın rastaǧan, bıraq sot qūjattarynan qate ketkenın alǧa tartqan.
"Būl şaǧymdy bastapqyda 2015 jyly "BTA Bank" AQ Mūhtar Äbliazov pen Iliias Hrapunovtyŋ üstınen tüsırgen. Izınşe jauapkerler tızımı ūzaryp, 2020 jyly qaraşa aiynda olardyŋ qūramyna Bolat Ötemūratov pen onyŋ biznes-qūrylymyna kıretın bırqatar tūlǧalar engen. Ol şaǧymnyŋ tüsuıne "BTA Bank" pen zaŋgerlerı bergen jalǧan qūjattar türtkı bolǧan. Jaqyn arada şaǧymǧa bailanysty aryz tüsırıledı" delıngen kompaniia habarlamasynda.
Äbliazovtyŋ jazuynşa, Ötemūratov özıne "aktivterın jasyruǧa kömektestı" degen küdıkke ılınıp otyr. Ol jazbasynda Qazaqstan ūlttyq qauıpsızdık komitetınıŋ töraǧasy Kärım Mäsımovtıŋ de esımın ataǧan.
Qazaqstan ūlttyq qauıpsızdık komitetınıŋ baspasöz qyzmetı äzırge jauap bermedı.
Bolat Ötemūratov – Qazaqstandaǧy eŋ auqatty adamdardyŋ bırı. Forbes onyŋ däuletın 2,8 mlrd dollarǧa baǧalaǧan. Ol eldegı tau-metallurgiia, mūnai-gaz, telekommunikasiia, qarjy qyzmetı, jyljymaityn mülık salasyndaǧy aktivterge ie.
Qazaqstan bilıgı eks-bankir Äbliazovty BTA bankınıŋ milliardtaǧan qarjysyn jymqyrdy dep aiyptaidy.
2009 jyldan berı şetelde tūryp kele jatqan oppozisiialyq saiasatker Mūhtar Äbliazov özıne taǧylǧan aiyptardy tolyq joqqa şyǧarady jäne bilıktı "aktiv kölemı jaǧynan eldegı eŋ ırı banktı tartyp aldy" deidı.
Nūr-Sūltan ony elge ekstradisiialauǧa küş salǧanymen, nätije şyqqan joq. Biyl qazan aiynda Äbliazov Fransiiadan saiasi baspana aldy.
2017 jyly Almaty soty Mūhtar Äbliazovty BTA bankınıŋ "aqşasyn jymqyru ısı" boiynşa kınälı dep tauyp, syrttai 20 jylǧa sottaǧan.
Foto aşyq derekközden alyndy
