“Mektep jarylady” dep qoŋyrau şalyp, Panfilov audanyndaǧy bır auyldy dürlıktırgen jasöspırımnıŋ äreketı äşkere boldy. Būl turaly «Adyrna» ūlttyq portaly Qazaqstan Respublikasynyŋ Işkı ıster ministrlıgınıŋ baspasöz qyzmetıne sılteme jasai otyryp habarlaidy.
Panfilov audanynyŋ Polisiia bölımıne Aqqūdyq auylyndaǧy mektep qyzmetkerlerı qoŋyrau şalyp, belgısız bıreudıŋ telefon arqyly mekteptıŋ tünde jarylatynyn habarlaǧanyn aitqan. Tärtıp saqşylary talapqa säikes äreket etıp, audandaǧy barlyq tiıstı qyzmet ökılderı oqiǧa ornyna jedel jinalǧan.
– Osy derek boiynşa QR Qylmystyq kodeksınıŋ 273-babyna säikes qylmystyq ıs qozǧaldy. Polisiianyŋ jeke qūramyna dabyl berılıp, oqiǧa ornyna jinaldy. Jarylǧyş zatty tabuǧa oblystyq PD “Arlan” jasaǧynyŋ saper toby jūmyldyryldy. Mektep ışı men jaqyn maŋy tolyǧymen tekserılıp, qoŋyrau şaluşynyŋ jalǧan aqparat taratqany däleldendı. Jedel-tergeu şaralary barysynda 14 jastaǧy jasöspırımnıŋ telefon şalǧany anyqtaldy. Özge aqparat tergeu müddesıne säikes jariialauǧa jatpaidy, – dedı Panfilov audany PB bastyǧynyŋ mındetın atqaruşy Jandos Kavliev.
Auyl tūrǧyndaryn dürbeleŋge salǧan qoŋyraudan keiın mektep maŋynda tūratyn otbasylar qauıpsız jerge şyǧarylǧan. Qandai da bır aqparat bıluı mümkın adamdardyŋ barlyǧynan jauap alǧan poliseiler telefon laŋkesın köpke ūzatpai anyqtaǧan.
2006 jyly tuǧan kämeletke tolmaǧan bala mektepke bomba qoiyldy dep qoŋyrau şalǧany anyqtaldy. Karantindık şaralarǧa bailanysty özge balalar jete almai jürgen bılım ordasyna barǧysy kelmegen jasöspırım osylai qaljyŋdaǧan.
– Qazırgı uaqytta sotqa deiıngı tergeu amaldary jalǧasuda. Tiıstı saraptama taǧaiyndaldy. Tergeu aiaqtalǧan soŋ ıs materialdary sotqa joldanyp, naqty prosessualdyq şeşım qabyldanatyn bolady, – dep tolyqtardy Jandos Kavliev.
"Adyrna" ūlttyq portaly
Foto aşyq derekközden alyndy
