ál-Farabı atyndaǵy QazUÝ-dyń Shyǵystaný fakýltetine qarasty TúrkSOI kafedrasynda Túrkııa Respýblıkasynyń qurylýynyń 93 jyldyǵyna «Túrkilerdiń mereıli merekesi» atty saltanatty kesh ótti.
Saltanatty shara Qazaqstan Respýblıkasy men Túrkııa Respýblıkasynyń memlekettik ánurandarymen ashyldy. Eń birinshi ál-Farabı atyndaǵy QazUÝ Shyǵystaný fakýltetiniń dekany, f.ǵ.d., professor Baıan Jubatova sóz sóılep, túrkııalyq baýyrlas halyqty tól merekesimen quttyqtady. «Qazirgi TúrkSOI, burynǵy Túriktaný kafedasynda Túrkııa Táýelsizdik kúnin jyl saıyn atap ótý dástúrge engen. Bul ıgi dástúr ármen qaraı da jalǵasyn taýyp otyrady. Bıyl bul shara ózgeshe, aıryqsha daıyndyqpen atalyp ótip otyr» deıdi fakýltet dekany.
Kelesi kezekte Túrkııa Respýblıkasynyń Almatydaǵy Bas Konsýly Ryza Qaǵan Iylmaz myrza sóz alyp, uıymdastyrýshylarǵa zor alǵysyn bildirdi. Eki eldiń týystyq qarym-qatynasyn nyǵaıtýdaǵy QazUÝ-dyń Shyǵystaný fakýlttetiniń, onyń ishinde TúrkSOI kafedrasynyń orasan zor úlesin atap ótti. Ryza Qaǵan Iylmaz myrza óz sózinde Qazaq eli men Túrkııanyń uzaq jylǵy baýyrlastyq qarym-qatynasyna tolymdy sholý jasap shyqty. Budan keıin Mustafa Kemal Atatúrik týraly shaǵyn derekti fılm kórsetildi. Ásire dinshildik tuńǵıyǵyna ketip, qurdymǵa túsken Osmanlylar patshalyǵyn jańasha zaıyrly damý dańǵylyna túsirgen Atatúrik túrik halyqtarynyń birligi men yntymaǵy jolynda da kóp eńbek sińirgeni barshamyzǵa málim. 1923 jyly 29 qazanda Túrkııa demokratııalyq respýblıka retinde jarııalandy. Bul kún búginde Túrkııa Táýelsizdik merekesi retinde atalyp ótedi. Bul, álbette, Atatúriktiń qajyrly eńbeginiń arqasy bolatyn. Atatúriktiń óz ultyn súıer memleketshildigi árbir eldiń basshylary úshin de úlgi bolarlyq is dep bilemiz. Sharanyń qurmetti qonaqtary retinde Túrki halyqtary mádenı qorynyń prezıdenti Ahmet Daǵduran, Shet tilder jáne iskerlik karera ýnıversıtetiniń rektory, doktor, professor Sabrı Hızmetlı, Eýrazııa ǵylymı-zertteý ınstıtýtynyń dırektory, doent, doktor Nevzat Shımshek myrza jáne taǵy basqa túriktanýshy ǵalymdar men zııaly qaýym ókilderi qatysty. TúrkSOI kafedrasynyń IV kýrs stýdenti Dılıaram Aıýpovanyń oqýynda qazaqtyń uly aqyny Maǵjan Jumabaevtyń «Alystaǵy baýyryma» atta túrik baýyrlastarǵa arnalǵan óleńin áserli etip oqyp shyqty. Osy oqý ordasynyń I kýrs stýdenti Dılnaz Tólegenova ór rýhty kóne túrik babalarymyzǵa arnalǵan Maǵjan Jumabaevtyń 
«Túrkistan» atty óleńin ortaǵa saldy. Sonymen qatar, II kýrs stýdentteri tarapynan «Halaı» atty túrikterdiń halyq bıi el nazaryna usynyldy. Al I kýrs stýdentteri qazaqtyń halyq bıi «Qara jorǵany» bılep, el qoshametine bólendi. Sultan Smaqov, Dáýlet Toqbolatov esimdi stýdentter túrik tilinde mánerlep óleń oqyp, kórermenniń kóńilin qosh etti. Sharaǵa arnaıy kelgen «Qazaqfılm» kınostýdııasynyń redaktory, senarıst, belgili ánshi, ónertanýshy Erlan Tóleýtaı aǵamyz Balýan Sholaqtyń «Sentıabr» ánin shyrqata oryndap, jınalǵan jurtty erekshe tánti etti. Halyqtyń suraýy boıynsha ol ekinshi ret sahnaǵa shyǵyp, Birjan saldyń «Oń saýsaq» ánin qubylta, arqalana oryndap, qazaqtyń ulttyq ónerin óz deńgeıinde tanyta bildi. Sonymen qatar, Qurmanǵazy atyndaǵy Qazaq ulttyq konservatorııasynyń I kýrs stýdenti Muhtar Ádil qazaqtyń beldi kompozıtory Qulshardyń «Kerbezkerik» kúıin, áıgili dáýlesker kúıshi Dáýletkereıdiń «Túrkimen» («Kóruǵly») kúıin oryndap, jurtshylyq nazaryna ilikti.
Kesh sońynda TúrkSOI kafedrasynyń meńgerýshisi, fılologııa ǵylymynyń doktory, professor Erden Zadauly Qajybek myrza qortyndy sóz sóılep, jınalǵan qaýymǵa alǵys bildirdi.
Arman SERIKULY
