Şymkent säulet jäne qala qūrylysy basqarmasynyŋ būrynǧy basşysy 498 mln. teŋge biudjet qarjysyn talan-tarajǧa salǧany üşın jazaǧa tartyldy, dep habarlaidy «Adyrna» tılşısı «Astana TV»-ge sılteme jasap.
Būl qarajat 2019 jyly qalanyŋ 49 myŋ 500 gektar aumaǧyna topografiialyq tüsırılım jasauǧa bölıngen. Alaida, Jeŋıs Baiymbetov memlekettık satyp aludy jürgızu kezınde zaŋ talaptaryn būzyp, lisenziiasy joq mekemenıŋ tenderde jeŋımpaz boluyna jol bergenı sotta dälelın tauypty. Al tenderde jeŋımpaz dep tanylǧan Aqjol Aitbaevtyŋ serıktestıgınde müldem mamany da, topografiialyq tüsırılım jasauǧa qūrylǧylary da bolmaǧany sotta aityldy.
- Ol bögde adamdardy jūmysqa tarta otyryp, qyruar qarjyny qolma qol aqşaǧa ainaldyrumen ainalysqan. Saldarynan maŋyzdy ıs bıtpegen.Nätijesınde memleketpen osy jūmystardy atqaruǧa bölıngen 498 mln teŋgenıŋ bylaişa aitqan kezde tübı joq. Atqarylǧan jūmystardyŋ aldaǧy uaqytta mynau qala qūrylysyndaǧy basqa da jerlerde eşqandai jaramdylyq qasietı joq. Sebebı jaramsyz,-dedı ıstı qaraǧan sudia Madiiar Abdrasilov.Eske salaiyq, Baiymbetov byltyr jazda sybailas- jemqorlyqqa qarsy qyzmet ökılderımen qamauǧa alynǧan. Sotta sondai-aq, eks-şeneunıktıŋ jymqyrǧan qarajatyn zaŋdastyru üşın qaladan satyp alǧan jerın tuǧan äpkesınıŋ atyna räsımdep, ol jerge kommersiialyq nysan tūrǧyzǧany belgılı boldy. Naryqtaǧy qūny 130 mln teŋge şamasynda tūratyn ǧimarat tärkılenıp alyndy. Būl ıste ymyralasa jūmys ıstegen Aitbaev ta bügın sottaldy. Sudia oǧan 8 jylǧa bas bostandyǧynan aiyru jazasyn kestı. Dese de, sottalǧandar ükımmen kelıspeitın siiaqty. Qorǧauşylary appeliasiialyq şaǧym tüsıretınderın mälımdedı.
«Adyrna» ūlttyq portaly
