Mańǵystaý aýdanyna qarasty Ushtaǵan aýylynda egizder ómirge kóp keledi. Eki myńǵa jýyq turǵyny bar aýylda 30 egiz jup bar. Olardyń úlkeni 40 jasta, kishisi 4 aılyq sábıler. Aýylda jyl saıyn keminde bir egiz dúnıege keledi eken. Demografııalyq ósimin jergilikti turǵyndar tańǵajaıyp qubylysqa balap otyr. Bul týraly Mańǵystaý aýdany ákimdiginiń baspasóz qyzmeti jazdy, dep habarlaıdy «Adyrna» tilshisi.
Bul aýylda «Egizder» dep atalyp ketken erekshe kóshe de bar. Mundaǵy 7 úıde de egizder turady. Sondaı-aq qos egiz ul-qyzdy tárbıelep otyrǵan Nazarovtar otbasy da osy aýyldyń týmalary. Analarynyń aıtýynsha bet-álpetinde eshqandaı aıyrmashylyq bolmaǵanymen minez-qulyqtary eki túrli.
«Biz muny "Táńirdiń syıy" dep sanaımyz. Egiz qyzymyzdan soń araǵa tórt jyl salyp taǵy egiz ulymyz dúnıege keldi . Keýdemizdi árqashan qýanysh kernep turady. Sózben aıtyp jetkizý qıyn, shúkirshilik etemiz»,-deıdi Ushtaǵan aýylynyń turǵyny Aıdos Nazarov.
Rasymen de, bir aýylda egizderdiń kóptep dúnıege kelýi sırek qubylys. Máselen, 1981 jyldan qazirgi ýaqytqa deıin birneshe egiz dúnıege esigin ashqan.
Aýyldaǵy eń kishkentaı egiz sábıler qazir 4 aılyq. Al, 2017 jyly egiz ul men qyzdy dúnıege ákelgen turǵynnyń aıtýynsha sol jyly perzenthanada birneshe egiz bala týǵan. Mamandar «bul qubylys áli tolyq zerttelmegenimen genetıkalyq turǵyda birneshe faktor áser etýi múmkin»,-deıdi.
Mańǵystaý aýdanyna qarasty bul aýyl ǵana emes, álemde Ushtaǵan syndy erekshe eldi-mekender bar eken.
«Adyrna» ulttyq portaly
