Mädeniet jäne sport vise-ministrı Säken Mūsaibekov qamauǧa alyndy, dep habarlaidy «Adyrna» tılşısı «Astana TV»-ge sılteme jasap.
Aqparatty sybailas jemqorlyqqa qarsy ıs-qimyl agenttıgı rastady. Ol bukmekerlık qyzmet salasynda bıreudıŋ müddesın qoldady dep küdıkke ılıngen. Özge aqparat tergeu erejesıne sai aitylmady. Säken Mūsaibekov būl qyzmetke 2020 jyldyŋ mamarynda ǧana taǧaiyndalǧan bolatyn.
«Mädeniet jäne sport vise-ministrıne qatysty sotqa deiıngı tergeu jürgızılıp jatyr. Ol bukmekerlık qyzmet salasynda belgılı kompaniia qūryltaişysynan qoldau körsetkenı jäne jalpy qamqorlyǧy üşın para aldy degen küdıkke ılındı. Sot sanksiiasymen para aluşy da, para beruşı qamauǧa alyndy»,-dedı agenttık ökılı Daniiar Bekaidarov.Sondai-aq «Alatau» klinikasynyŋ basşysyna qatysty da tergeu bastalǧan. Därıger onkologiialyq nauqas balalarǧa arnalǧan azyq-tülıktı ūrlau jäne satu faktısı boiynşa ıstı bolyp otyr. Küdıktı qazırgı uaqytta qamauǧa alynǧan.
«Adyrna» ūlttyq portaly
