20 aqpan künı Qostanai oblysynyŋ Amangeldı audany Bırälı qystaǧynan jylqy qaiyramyn dep şyqqan Amangeldı Tūrjanov qatty boranǧa tap bolady. Al ol kısınıŋ ız-tüssız joǧalǧany jaily jaqyndary tötenşe jaǧdailar qyzmetıne 21 aqpanda habarlaidy.
Izdestıru-qūtqaru şaralaryna tötenşe jaǧdai, polisiia qyzmetkerlerımen qosa jergılıktı tūrǧyndar da belsene at salysyp, Nūrsūltan qalasynan arnaiy tıkūşaq ta jūmyldyrylady. Alaida aua-raiynyŋ qolaisyzdyǧyna bailanysty ızdeu amaldary eş nätije bermegen. Tek araǧa apta salyp, Amangeldı Tūrjanov Qostanai jäne Qaraǧandy oblystary şektesetın aumaqtan aman-esen tabylady.
Adasqanymdy araǧa 2-3 saǧat salyp tüsıne bastadym. Aq tütek boran köterıle bastaǧasyn, panalaityn jer kezıger me dep yǧyp jüre berdım. 3 kün atqa öz küşımmen mınıp tüsıp jürdım, dene jattyǧularyn jasap, aman qaludyŋ amaldaryn jasauǧa tyrysyp baqtym. - deidı jylqyşy.Bırneşe kün när tatpaǧan azamat keiın älı ketıp, qaljyrap, bärınen küder üzıp, aqyry ornynan tūra almai jatyp qalǧanyn aitady.
Besınşı kün degende atymnyŋ qar astynan şöp jep jatqanyn baiqap, men de körmek boldym. Basynda qiyndau boldy, degenmen ekı kün boiy sony qorek etumen boldym. Qatty qinalǧan sätterımde marqūm anam elesteumen boldy. Özımen alyp ketuın jalynyp sūraǧanymda, qol sıltep kete bardy. Artynşa 15-20 minuttan soŋ tıkūşaqty baiqadym. Bırınşı bolyp ūlym jügırıp kep qūşaqtaǧany ǧana esımde.As-susyz aidalany jetı kün tünegen jylqyşy özın ömırge qaita kelgendei sezınedı. Bır ölımnen qaluynyŋ sebebın eşkımge eş qiianat jasamai, adal eŋbek etuımen bailanystyrady. Abyroi bolǧanda, apta boiy aq boran men qaqaǧan aiazda ien dalany meken etken malşynyŋ densaulyǧyna auyr zaqym kelmegen, azdap sausaqtarynyŋ ūşyn üsık şalǧan. Qazır ol Jezqazǧan qalasynda auruhanada em qabyldauda.
Nazgül ŞABDAROVA, «Adyrna» ūlttyq portaly
