Äkım köpbalaly anany aldap, jalǧan aqşa ūstatqan

Aqtöbede köpbalaly anaǧa sertifikat tabystaǧan oblys äkımınıŋ basy dauǧa qaldy. Aisūlu Küzdıbaevaǧa Alǧys aitu künı Oŋdasyn Orazalin el aldynda ekı million teŋge dep jazylǧan qaǧaz ūstatady. Al onysynyŋ kök tiyn qūny bolmai şyqty, dep habarlady KTK. Şeneunıkter erıktılerdıŋ eŋbegın özı enşılemek bolǧan. Äkımdıktegıler qaiyrymdy jandardyŋ būǧan deiın körsetken kömegın sertifikatqa jazyp bergenın moiyndap otyr. Anau-mynau emes, öŋır basşysynyŋ özı 2 millionnyŋ sertifikatyn saltanatty türde tabystaǧanda aqtöbelık Aisūlu Küzdıbaevanyŋ quanyşynda şek bolmapty. Keiın Oŋdasyn Orazalinnıŋ ūstatqany qūny joq qūr qaǧaz ekenın bılgende saly suǧa ketken. Qazır ol sertifikat kışkentailarynyŋ oiynşyǧyna ainaldy. Būlai jūrt alynda kädege jaramaityn sertifikatty berudıŋ ne qajetı bar edı deidı köpbalaly ana. "Ekı millionnyŋ üstıne şamaly aqşa qosyp üi alamyn dep oiladym. Bergen kezde quandym, ötırık aitpaiyn. Körşılerım qūtty bolsyn aityp keldı. Ekı million alypsyŋ dedı. Būl qūr qaǧaz bolyp şyqty. Maǧan būl aqşa berılgen joq", - deidı köpbalaly ana Aisūlu Küzdıbaeva. Jataqhananyŋ aiadai bölmesınde bes balasymen tūratyn Aisūlu jyl basynda äleumettık jelı arqyly elden kömek sūraǧan. Sol kezde erıktıler kerek-jaraǧyn alyp berıp, bölmesıne jöndeu jürgızıptı. Al äkımdık tarapynan eşqandai qoldau bolmaǧan. "Ol otbasynyŋ tūrmystyq jaǧdaiy qiyn eken. Jastar bolyp özımız jöndeu jūmysyna aqşa jinadyq. Edenınen bastap, töbesı men qabyrǧasyna deiın jaŋalap berdık. Qosymşa kerektı jihaz ben teledidar alyp berdık", - deidı erıktı Şahretdin Azimov. Oqi otyryŋyz: Danial Ahmetov şkaftyŋ esıgın aşyp jatqan kezde kütpegen jaǧdai boldy – video Erıktılerdıŋ eŋbegın enşılep, jomart jandar jinap bergen qarjyny sertifikatqa 2 million dep jazyp bergenderın şeneunıkter de moiyndaidy. Bıraq kök tiyn qūny joq bır japyraq qaǧazdy köpbalaly anaǧa saltanatty türde tapsyruǧa ne türtkı bolǧanyn tüsındırıp bere almai otyr. "Osy igı ıstı basqalarǧa ülgı etu maqsatynda jastardyŋ atynan sertifikat tapsyryp, olarǧa alǧysymyzdy bıldırgımız keldı. Onda Aisūlu hanymǧa jūmsalǧan qarjyny körsettık", - deidı Aqtöbe oblysy QHA hatşylyǧynyŋ meŋgeruşısı Marjan Qorǧanbaeva. Bes balanyŋ anasy Aisūlu Küzdıbaevanyŋ atynda baspana joq. Tūryp jatqan jataqhanadaǧy bölmesın tuystary bergen. Joldasy qystauǧa qatynap qoi baǧady. Al äkımdıktegıler osy daudan soŋ qandai da bır kömek beru turaly jaq aşpai otyr. Eŋ bolmaǧanda keşırım sūrap baratynyn da aitpady.