Almaty oblysynda äue apatynan aman qalǧan äskeri qyzmetkerler esın jidy, dep habarlaidy KTK telearnasy.
Saǧi Beisenbekov, Almaty № 4 klinikalyq auruhanasynyŋ bas därıgerı:
- Jaǧdailary tūraqty auyr, jansaqtau bölımınde jatyr. Ekı nauqas ta esın jidy.Apat Qyzyltu auylynyŋ maŋynda 13-nauryzda bolǧan. Nūr-Sūltan qalasynan kökke köterılgen Ūlttyq qauıpsızdık komitetı Şekara qyzmetınıŋ An-26 äskeri ūşaǧy otqa oranyp, Almaty äuejaiynyŋ ūşyp-qonu jolaǧyna jete almai qūlaǧan. Äue kemesınıŋ bortynda bolǧan 6 adamnyŋ törteuı oqiǧa ornynda ajal qūşty. Al esın jiǧandardyŋ bırı – ekipaj komandirı Artem Aşirov būǧan deiın auyr hälde jatqan bolatyn. Qazır därıgerler ekı äskeri qyzmetkerdıŋ ömırın saqtap qalu üşın baryn salyp jatyr. Al apattyŋ sebebın arnaiy komissiia tergeu aiaqtalǧan soŋ jariialaidy.
