Türkıstan oblysynda qalta ūrlyǧymen ainalysyp jürgen anasy men qyzy ūstaldy, dep habarlaidy «Adyrna» tılşısı Polisia.kz-ke sılteme jasap.
Maqtaaral audanynyŋ PB kezekşı bölımıne bırneşe jergılıktı tūrǧyn aryzdanǧan. Jäbırlenuşı azamatşalardyŋ aituynşa, kündız Maqtaaral audany Atakent kentınıŋ köşelerınıŋ bırınde ornalasqan bazar aumaǧynda qalta ūrylaryna tap bolǧan. Olardyŋ bırınıŋ ışınde 200 myŋ teŋgesı men bank kartochkalary salynǧan ämiianyn, endı bırınıŋ ışınde 10 000 teŋge aqşasy bar ämiianyn belgısız bıreuler qoldy etken.
Tärtıp saqşylary būl jaitty QR QK-nıŋ 188-baby (Ūrlyq) boiynşa tırkedı. Audan poliseilerı qylmystyŋ ızın suytpai aşu maqsatynda jedel-ızdestıru ıs-şaralaryn jürgızdı. Ainalany baqylap, beinekameralardy jıtı tekserdı. Nätijesınde küdık tudyrǧan ekı äieldı baiqaǧan.
Küdıktı äielder anasy men qyzy bolyp şyqty. Tekseru barysynda olardyŋ Şymkent qalasynyŋ tūrǧyndary ekenı anyqtaldy. Qazırgı taŋda öz kınälaryn tolyq moiyndaǧan qalta ūrylaryna qatysty tergep-tekseru amaldary jürgızılude.
Tergeu barysynda küdıktılerdıŋ aldyn ala söz bailasyp, oŋai jolmen aqşa tabudy közdegenı anyqtaldy. Osylaişa ekeuı adam köp şoǧyrlanatyn aimaqtardy bır şolyp şyǧyp, bazar maŋynda adamdardyŋ yǧy-jyǧy bolyp jatqanyn körıp, jäbırlenuşılerdıŋ sömkelerınen bıldırtpesten ämiiandaryn alyp ketken. Olar qylmystyq jolmen tabylǧan qarajatty öz qajettılıkterıne jūmsap ülgergen.
«Adyrna» ūlttyq portaly
