Qazaqstan áskeri bitimgerlik mıssııamen álemniń biraz elinde óz boryshyn óteýde. Alǵash ret bitimgerlik kúshteri retinde 1992 jyly 10 qyrkúıekte qazaqstandyq 300 sarbaz Tájikstanǵa attandy. Artynsha olardyń sany artyp, 2000 jylǵa deıin 10500 sarbaz Tájikstandaǵy bitimgerlik mıssııasyn atqardy. Dál osy eldegi soǵystan keıin Qazaqstannyń btimgerlik kúshterine "Qazbat" batalony jasaqtaldy. Keıinnen Qazaqstannyń bitimgerlik kúshteri Irakty mınadan tazartty, Afrıka elderinde beıbitshilikti saqtaýǵa atsalysty, qazir Lıvan men Batys Saharada tynyshtyq rejımin buzbaý maqsatyndaǵy mıssııalarǵa qatysýda.
1995 jyly, 7 sáýirde táýelsiz Qazaqstan tarıhyndaǵy urys barysynda eń úlken áskerı shyǵynǵa ushyradyq. Qazaqstannyń bitimgerlik kúshteri Tájikstandaǵy arnaıy mıssııa barysynda, tájik-aýǵan shekarasyndaǵy Pshıhavr taý shatqalynda qorshaýda qalyp, qııan-keski urys júrgizdi. Bizdiń jaýyngerler qarsha boraǵan oq pen jerdi silkindire jarylǵan granata, granatometterge qaramastan, sany ondaǵan ese kóp sodyrlarmen 5 saǵat aıqasty. 5 saǵattan keıin Reseı sarbazdary kómekke keldi. Qazaqstan bitimgerlik kúshteri tarapynan 17 sarbaz qaza taýyp, 33 jaýynger aýyr jaralandy. Reseı tarapynan 70-ten astam sarbaz oqqa ushty. Sodyrlardyń shyǵyny birneshe júzge jetedi.
Qaza tapqan, urysqa qatysqan jaýyngerlerdiń barlyǵy derlik joǵary áskerı marapattarǵa ıe boldy. Kómekke kelgen Reseı tikushaǵynyń bir ushqyshy oqıǵa jaıly keıinnen bylaı dep pikir bildirdi: "Men ushyp kelgende, tómende az ǵana toptyń sany birneshe júzge jetetin sodyrlarmen qııan-keski urys júrgizip, jan aıamaı soǵysyp jatqanyn kórdim". Atalmysh urys jaıly 2019 jyly "Qazbat" fılmi túsirilip, kókrermender nazaryna usynyldy.
Tájikstandaǵy bitimgerlik mıssııasyn atqarý barysynda jalpy jıyntyǵy 54 qazaqstandyq qaza taýyp, iz tússiz joǵalyp ketti.
Ashat QASENǴALI,
"Adyrna" ulttyq portaly
