Elordada säuırdıŋ 3-ı künı «Saraişyq: ūly qala tarihy» taqyrybymen Halyqaralyq ǧylymi konferensiia ötkızu josparlanyp otyr, dep habarlaidy "Adyrna."kz QR Mädeniet jäne sport ministrlıgınıŋ baspasöz qyzmetıne sılteme jasap.
Ǧylymi mäjılıske 40-tan astam otandyq jäne şetel ǧalymdary qatysady. Barlyǧy ortaǧasyrlyq Saraişyq qalaşyǧyn saqtap qalu boiynşa şaralar men ǧylymi zertteulerdıŋ qorytyndysyn talqyǧa salmaq. Konferensiianyŋ negızgı maqsaty - qalaşyqty qalpyna keltıru men būzyludan saqtau mäselelerıne joǧary bılıktı şeteldık jäne otandyq ǧalymdardyŋ nazaryn audaru. Sebebı bügıngı taŋda tabiǧi-klimattyq jäne antropogendık faktorlardyŋ äserınen Saraişyq qalaşyǧynyŋ jaǧdaiy ministrlıktıŋ, äkımdıktıŋ, qoǧam men ǧalymdardyŋ alaŋdauşylyǧyn tuǧyzuda.
Ǧylymi konferensiiaǧa QR Mädeniet jäne sport ministrı A.Mūhamediūly, QR Parlamentınıŋ deputattary, tarih ǧylymdarynyŋ doktorlary, belgılı arheologtar Z.Samaşev, K.Baipaqov, J.Taimaǧambetov, B. Kömekov, filosofiia ǧylymdarynyŋ doktory, professor, QR ŪǦA akademigı Ǧ.Esım, A. Baqtygereeva, M. Qūlkenov, Q.Jylqyşiev tärızdı qoǧam jäne mädeniet qairatkerlerı, jaqyn jäne alys şetel ǧalymdary, qoǧamdyq ūiymdardyŋ, memlekettık mekemelerdıŋ ökılderı, joǧary oqu oryndarynyŋ studentterı jäne BAQ qatysady.
Sonymen qatar, konferensiia aiasynda Saraişyq qalaşyǧy tarihyna arnalǧan körme ūiymdastyrylady. Körmege ejelgı qalaǧa qatysty köptegen qūndy arheologiialyq būiymdar, kartinalar jäne taǧy basqa zattar qoiylatyn bolady.
"Adyrna."kz
