Şymkentte 5 demalys aimaǧynda suǧa şomyluǧa rūqsat etılgen

Şymkent qalasynda aua raiynyŋ kürt jylynyp ketuıne bailanysty suǧa şomylu mausymy özge öŋırlerge qaraǧanda erte bastalyp ketedı. Resmi türde şomylu mausymy aşyq dep jariialanbasada bügınde balalar suǧa şomyludy bastap ketken. Osyǧan orai, tötenşe jaǧdailar departamentı suǧa şomylu mausymyna daiyndyq jäne qauıpsızdık şaralary jönınde aityp, qauıpsızdık erejelerın saqtauǧa şaqyrady. Qauıpsızdık adam ömırındegı eŋ maŋyzdy faktordyŋ bırı bolyp tabylady. Osy oraida, atalmyş departament öz qūzyry aiasynda öŋırdıŋ su aidyndarynda eresekter men balalar ölımıne jol bermeu şaralaryn qamtamasyz etedı. Şymkent qalasynyŋ aumaǧynda qazırgı taŋda suǧa şomyluǧa rūqsat etılgen 5 demalys aimaǧy bar. Olar Toǧys su qoimasyndaǧy «Holodilnik» demalys orny, Badam su qoimasyndaǧy «Rahat Badam» demalys orny, Qoşqar ata özenınıŋ bastauy, Şymkent memlekettık dendrologiialyq saiabaǧyndaǧy köl men «Jailauköl» (Tūlpar). Atalǧan demalys aimaqtarynyŋ ielerı demaluşylardyŋ qauıpsızdıgıne tıkelei jauapty bolady.

Tötenşe jaǧdailar departamentımen qazırgı kezde sudaǧy qauıpsızdık ıs-şaralaryna bailanysty jergılıktı organdarmen bırıgıp jūmys jürgızılude. Sonymen qatar, qala kölemınde Departament qyzmetkerlerımen «Qauıpsız jaz» aksiiasy aiasynda būqaralyq aqparat qūraldary arqyly maqalalar jariialanyp, sūhbattar ūiymdastyrylyp, halyqpen äŋgımelesu jūmystary jürgızılude.

Būdan bölek, Departamenttıŋ qūrylymdyq bölımşelerı audandyq polisiia basqarmalarynyŋ qyzmetkerlerımen bırlesıp şomylu mausymy aiasynda kündelıktı reidtık ıs-şaralar jürgızetın bolady. Bılım basqarmasymen bırlesıp, «Sudaǧy qauıpsızdıktı qamtamasyz etu maqsatynda WhatsApp äleumettık jelılerı arqyly mektepter men balabaqşalardyŋ «Ata-analar» toptaryna jadnamalar men beinerolikter ornalastyru jūmystary belsendı türde jüzege asyryluda.

Şymkent qalasy äkımdıgınıŋ baspasöz qyzmetı