Erekşe qajettılıkterı bar balalarǧa arnalǧan jaŋa ortalyqtar aşylmaq

       Elbasynyŋ "Qamqorlyq" bastamasy qamqorşylar keŋesınıŋ otyrysy barysynda erekşe qajettılıkterı bar balalarǧa, sondai-aq qart adamdarǧa arnalǧan infraqūrylym qūruǧa baǧyttalǧan ekı bastamany ıske asyru talqylandy. Elbasynyŋ tapsyrmasyna säikes "Qamqorlyq" bastamasy şeŋberınde ekı jyl ışınde Qazaqstannyŋ 8 öŋırınde autizmı jäne basqa da mentaldı būzylystary bar balalarǧa arnalǧan tüzetu-damytu ortalyqtaryn aşu közdelgen, onda 18 jasqa deiıngı balalardyŋ kündızgı boluy, olardyŋ damuyna arnalǧan jaǧdailar jäne Otbasyn qoldau qyzmetınıŋ jūmysy közdeletın bolady. Ortalyqtarda älemdık däleldengen praktikalar negızınde balalardyŋ äleumettık beiımdeluı men ömırlık daǧdylaryn damytu üşın sabaqtar ötkızıletın bolady. Būdan bölek, balalar mügedektıgınıŋ aldyn alu mäselesın şeşu üşın elımızdıŋ 17 öŋırınde perinataldyq ortalyqtar bazasynda erte aralasu ortalyqtary aşylmaq. Zeinetkerlık jastaǧy adamdardy qoldaudyŋ jüielı şaralaryn damytuǧa jäne olardy qoǧamǧa tartuǧa erekşe nazar audarylǧan. "Belsendı ūzaq ömır" atty jaŋa bastama elımızdıŋ 17 öŋırınde kommunaldyq obektılerdıŋ bos tūrǧan alaŋdarynda  Belsendı ūzaq ömır süru ortalyqtaryn aşudy közdeidı. Atalǧan ortalyqtarda emdık dene şynyqtyru, kompiuterlık sauattylyq, şahmat sabaqtary, öskeleŋ ūrpaqty, onyŋ ışınde balalar üiınıŋ balalaryn qoldauǧa jäne patriottyq tärbieleuge baǧyttalǧan äleumettık baǧdarlamalardy ıske asyru közdeletın bolady. Ortalyqtarda mekendeu qarastyrylmaǧan, tamaqpen qamtamasyz etıletın kündızgı bolu josparlanǧanyn aita ketu kerek. "Elbasynyŋ "Qamqorlyq" bastamasy aiasynda jylyna 21 000 bala üşın oŋaltu men käsıbi süiemeldeuge qol jetkızu ūiymdastyryldy, būl soŋǧy onjyldyqta erekşe qajettılıkterı bar balalar üşın eŋ auqymdy jobalardyŋ bırı bolyp tabylady", - dep atap öttı "Qamqorlyq" bastamasy Qamqorşylyq keŋesınıŋ töraǧasy Ä. Ö. İsekeşev.        Bastamalardy Nūrsūltan Nazarbaev Qory Ükımet, "Samūryq-Qazyna "ŪÄQ" AQ jäne öŋırlerdıŋ äkımdıkterımen bırlese otyryp ıske asyruda. Esterıŋızge sala keteiık, Elbasynyŋ "Qamqorlyq" bastamasy aiasynda 2020 jyldyŋ jeltoqsanynda jyl saiyn 5 myŋ balany qamtityn segız oŋaltu ortalyǧy aşyldy. Aǧymdaǧy jyly bastama aiasynda Aqmola, Aqtöbe, Almaty, Şyǧys Qazaqstan, Jambyl, Qyzylorda, Maŋǧystau jäne Türkıstan oblystarynda qosymşa 10 ortalyq qūru boiynşa jūmys jürgızılude.