El eki sıyryn jaıa alatyn jer tappasa, jerimizdiń keńdiginen ne paıda?
JER BOLMASA - EL BOLMAIDY!
QR Parlamenti Májilisi depýtaty, “Aq jol” partııasy frakııasy múshesi Qazybek Isanyń Májilistiń jalpy otyrysyndaǵy sózi:
Baǵzy zamannan batyr babalarymyz qany men terin tógip, janymen qorǵaǵan qazaqtyń qasıetti baıtaq Jeri - qaı kezde de, barlyq uǵymdardan joǵary!
Bizdiń dáýirimizge deıin ómir súrgen Ǵun ımperııasynyń qaǵany Móde babamyzdan kórshiles jatqan memlekettiń patshasy eń júırik tulparyn surasa da, úıindegi asyl jaryn, ińkárin surasa da “el soǵysyp, qan tógilmeı-aq qoısyn” dep berip jiberipti. Bar asylyn suraǵanda úndemeı kelisken qaǵan
dándegen jaý Jerin surap kelgende, “Al endi biz soǵysamyz, turysatyn jerińdi aıt!”-dep, atqa qonyp, elge uran tastapty!
Biz sol ǵundardyń urpaǵymyz!
Budan bir ǵasyr buryn Alash kósemi Álıhan Bókeıhan da “Jer degende dirildemeı bolmaıdy” dep elge úndeý tastap edi.
Al 2016 jyly elimizde jer daýy kóterilgen kezde «Aq jol» partııasy óziniń naqty resmı ustanymyn bildirip, jerdi sheteldikterge satpaý ǵana emes, jalǵa da bermeý týraly usynys jasap, dabyl qaqty. Bul ustanym partııamyzdyń Saıası Baǵdarlamasynda da jazýly.
Al bıylǵy 2021 jyldyń 20 qańtarynda Májilistiń VII shaqyrylǵan jańa quramynyń birinshi ótken jalpy otyrysynda birinshi bolyp «Aq jol» partııasy Úkimetke Jer kodeksine tıisti ózgerister engizip, eldi alańdatqan jer daýynyń sheshilýine núkte qoıý kerektigi týraly depýtattyq saýal jasady. Sodan soń bıylǵy Ulttyq keńestiń besinshi otyrysynda Qazaqstan Prezıdenti Q.Toqaevtyń aýylsharýashylyǵy jerin sheteldikterge berýge tyıym salý týraly tapsyrmasy shyqty.
Búgingi bul zań jobasy Memleket basshysy tapsyrmalaryn oryndaý maqsatynda jáne Jer reformasy jónindegi komıssııa qyzmetiniń qorytyndysy.
-Jer zańyna qosylǵan bul ózgeristerden keıin jerdiń paıdalanylýy men qorǵalýyn memlekettik baqylaý kúsheıedi
-qazir barlyq jerde daýǵa aınalǵan mal jaıýǵa qajetti jaıylymdardyń tapshylyǵyn sheshý úshin, tek qana jergilikti halyqtyń muqtajy úshin paıdalanylatyn jaıylym aýmaqtary aıqyndalady.
El esiginiń aldyndaǵy eki sıyry men bes qoıyn jaıa alatyn jer tappasa, baıtaq jerimizdiń keńdiginen ne paıda?
Qoryta aıtqanda, zań jobasy jer zańnamasyn odan ári jetildirýge, jer qatynastaryndaǵy barlyq problemalardy sheshýge arnalýy tıis.
“Aq jol” Jer daýyna núkte qoıýǵa shaqyrsa da, jerdiń daýly baptary boıynsha Jer komıssııasy taǵy da moratorıı jarııalady.
Moratorıı - 5 jyl, al Jerimiz ben Elimiz Máńgilik bolýy tıis ekenin eshqashan umytýǵa bolmaıdy!
Óıtkeni, Jer bolmasa - El bolmaıdy!
Halyqtyń baǵa jetpes asyl qazynasy - qasıetti Qazaq Jeriniń qadirine jete bileıik!
“Aq jol” partııasy halyq talabymen jasalǵan zań jobasyn qoldaıdy!
Qurmetpen, “Aq jol” partııasy frakııasy músheleri
