Balalardyń járdemaqysyn kóterip, árqaısyna 42 500 teńgeden tóleýge múmkindik joq. Eńbek jáne halyqty áleýmettik qorǵaý mınıstri Serik Shápkenov sońǵy ýaqytta qoǵamda qyzý talqylanǵan suraqqa jaýap berdi. Onyń sózinshe, mınıstrlikte bólingen qarjy árbir tıynyna deıin eseptelgen eken. Sondyqtan járdemaqylardyń barlyǵyn bir tólemge biriktiretin bolsa, basqa sanatqa kiretin adamdarǵa zeınetaqy tóleýge qarjy jetpeı qalýy múmkin. Osy oraıda, mınıstr bul máselelerdi qamtý maqsatynda áleýmettik kodeks daıyndalyp jatqanyn jetkizdli. Mamandar, álemdik tájirıbeni jan-jaqty zerdelep, jańa qujattyń aıasynda áleýmettik qoldaýdyń tıimdi sharalaryn qarastyrmaq, dep habarlaıdy «Adyrna» ulttyq portaly «Eýrazııa» birinshi arnasyna silteme jasap.
«Biraq biz ekinshi jaǵyn da eskerýimiz kerek. Qazirdiń ózinde 18 jasqa deıingi 6 mıllıonnan astam balalar bar. Árbireýine 42 500-den eseptesek, qomaqty qarajat shyǵady. Men aıta keter edim, bizdiń mınıstrlikte qazirgi bıýdjeti 4 trıllıonǵa jaqyn. Respýblıkalyq bıýdjet, shamamen, 14 trıllıon teńge bolady. Sonda qazirdiń ózinde biz bıýdjettiń úshten bir bóligin alyp otyrmyz. Sonyń 96% járdemaqy men zeınetaqy sııaqty kisilerge taratylyp beriledi», - deıdi QR eńbek jáne halyqty áleýmettik qorǵaý mınıstri Serik Shápkenov.
Sondaı-aq vedomstvo basshysy dál qazir zeınet jasyn tómendetý máselesi qarastyrylmaǵanyn málimdedi. Óıtkeni belgilengen meje tómendetiletin bolsa, azamattardyń kóp bóligi qarttyqqa deıin qajetti somany jınap úlgermeýi múmkin eken. Biraq Serik Shápkenov zeınetaqy qarjysy annýıtetti bolǵandyqtan, qorǵa salynǵan belgili somany merziminen buryn alýǵa bolady deıdi. Máselen bıyldan bastap 55 jasqa deıingi er adamdar jınaqtaýshy qorynda 11,3 mln teńgeden astam qarjy jınap úlgerse, ústindegi somany alýǵa quqyly eken.
"Adyrna" ulttyq portaly
