Şymkent qalasynda jyl basynan berı tūrǧyn üidı jekeşelendıru boiynşa elektrondy türde 108 azamat qūjat tapsyrǧan. Onyŋ ışınde 83 azamattyŋ ötınışı qanaǧattandyrylyp, päterlerı jeke menşıgıne ötkızıldı. Qazırgı taŋda qalǧan azamattar boiynşa jekeşelendıru jūmystary jürgızılude.
Jekeşelendırılıp jatqan päterler «Nūrly jer» memlekettık baǧdarlamasy qoldanysqa engızılgenge deiıngı baspanalar bolyp tabylady. Al, «Nūrly jer» baǧdarlamasy 2016 jyly qoldanysqa engızılgen.
Memlekettık tūrǧyn üi qorynan berıletın tūrǧyn üilerdı jekeşelendıru QR «Tūrǧyn üi qatynastary turaly» Zaŋyna, «Memlekettık tūrǧyn üi qorynan berıletın tūrǧyn üilerdı jekeşelendıru qaǧidasyna» jäne QR Ūlttyq ekonomika ministrlıgınıŋ «Memlekettık tūrǧyn üi qorynan berıletın tūrǧyn üilerdı jekeşelendıru» memlekettık körsetıletın qyzmet standartyna säikes jüzege asyrylady.
2020 jyldan bastap memlekettık tūrǧyn üi qorynan berıletın üilerdı jekeşelendıru www.egov.kz «elektrondyq ükımet» veb-portaly arqyly jüzege asyryluda. Atalǧan qyzmettı alu üşın azamattyŋ jäne onyŋ kämeletke tolǧan otbasy müşelerınıŋ (ESQ) elektrondyq sifrlyq qoltaŋbasy bolu tiıs.
2019 jyly 188 azamattyŋ memlekettık tūrǧyn üi qorynan berılgen päterlerı jeke menşıkterıne ötkızıldı. Al 2020 jyly būl qyzmettı alǧan azamattar sany 102-nı qūraǧan.
Aita keterlık jait, «Nūrly jer» memlekettık baǧdarlamasy aiasynda qūrylysy jürgızılıp paidalanuǧa tapsyrylǧan arendalyq tūrǧyn üiler baǧdarlama talaptaryna säikes, satyp alu qūqyǧynsyz jaldau şarty negızınde berılgen. Sondyqtan atalǧan baǧdarlama aiasynda azamattarǧa jalǧa berılgen päterler jeke menşıkke berılmeitındıgın nazarlaryŋyzǧa salamyz.
Şymkent qalasy äkımdıgınıŋ baspasöz qyzmetı
