Şymkent qalasy äkımınıŋ orynbasary Maqsūt İsahov qalanyŋ strategiialyq damuy aiasynda atqarylǧan jūmystar boiynşa baspasöz brifingın ötkızdı.
Maqsūt Pernebaiūly jolauşylar kölıgı jäne avtomobil joldary, qalalyq orta sapasy jäne baqylau, dene şynyqtyru jäne sport, eŋbek inspeksiiasy, turizm jäne syrtqy bailanystar jäne sifrlandyru basqarmalarynyŋ bes aidaǧy negızgı jūmystaryn qorytyndylady.
Brifingte qala äkımınıŋ orynbasary aldymen jol-kölık salasyna toqtalyp öttı. Onyŋ mälımdeuınşe, qala boiynşa 79 marşruttyŋ 57-ı nemese 73%-y keşendı shemaǧa säikes keledı.
«Tölem» elektrondyq bilettendıru jüiesı ıske qosylǧannan bügınge deiın 26,8 mln. tranzaksiia jasalyp, 22,7 mln teŋgege, iaǧni 80%-dan astam kartamen tölem jasalǧan. Şaharda jolauşylarǧa qolaily jaǧdai jasau üşın avtobustardy onlain rejimde köruge mümkındık beretın «I-kolik» mobildık qosymşasy paidalanuǧa berıldı.
Şymkent qalasynda avtomobil joldarynyŋ jalpy ūzyndyǧy – 3 247,6 şaqyrym. Biyl qalada 168 nysanǧa – 295,3 şaqyrym jolǧa qūrylys-jöndeu jūmystary jürgızılıp, jyl soŋyna deiın 155 nysan – 248,8 şaqyrym paidalanuǧa berıledı.
– Işkı oram jäne şalǧaidaǧy eldımekenderdegı köşelerge zerdeleu nätijesı körsetkendei, topyraq jabyndysy bar 172 şaqyrym köşe anyqtaldy. Biyl 153 şaqyrym topyraq köşelerge tas töseledı. Qazırgı taŋda 40 % jūmystar atqaryldy. Eŋ ülken qūrylys nysandarynyŋ qatarynda – Rysqūlov-Qonaev köşelerınıŋ qiylysyndaǧy jolairyq, Qonaev daŋǧylynyŋ jalǧasy, A-2 avtomagistralynyŋ 1,2,4-kezeŋderı bar. Sondai-aq, kürdelı jöndeu jūmystary biyl 65 köşede (49,0 şaqyrym) jürgızılude. Būl jūmystardy biyl tolyǧymen aiaqtap, qyrküiek aiynda paidalanuǧa tapsyramyz, – dedı qala äkımınıŋ orynbasary.
Maqsūt İsahov ortaşa jöndeu jūmystarynyŋ barysyn atap öttı. Biyl 146 nysanda (173,3 şaqyrym) ortaşa jöndeu jūmystary atqaryluda. Jyl qorytyndysy boiynşa būl jūmystar tolyǧymen aiaqtalady. Atap aitqanda, 7 magistraldy köşe, 69 ışkı oram köşe, şalǧai eldımekenderdegı 62 köşe, 8 oŋ jaq ötkelder nysany. Joldardyŋ 50 %-ǧa juyǧy şalǧai eldımekenderde ornalasqan. Jūmystardy qazan aiyna deiın tolyǧymen aiaqtau josparlanuda.
Şymkent qalasy äkımdıgınıŋ baspasöz qyzmetı
