Bul týraly sybaılas jemqorlyqqa qarsy kúres jónindegi óńirlik komıssııa otyrysynda belgili boldy.
Aımaq basshysy jetekshilik etken jıynǵa oblys ákiminiń orynbasarlary, quqyq qorǵaý salasynyń basshylary, selektorlyq rejımde aýdan ákimderi qatysty.
Kún tártibinde «Laýazymdyq ókilettikterdi teris paıdalaný» jáne «Para berý» sybaılas jemqorlyq qylmystardyń ósý máselesi men monıtorıng nátıjeleri qaraldy.
Sybaılas jemqorlyqqa qarsy is-qımyl agenttiginiń Atyraý oblysy boıynsha departamentiniń basshysy Qanat Súleımenov búgingi tańdaǵy jemqorlyq qylmysynyń kórsetkishine toqtaldy.
«Eger 2020 jyly oblysta jemqorlyq deńgeıi 12% tómendese, al aǵymdaǵy jyldyń 1 toqsanynda 41% tómendedi»,-degen Q.Súleımenov, degenmen quqyqtyq statıstıkada paraqorlyq jáne laýazymdyq ókilettigin teris paıdalaný faktisiniń ósý tendenııasy jalǵasýda ekenin atap ótti.
Sondaı-aq, departament basshysy bul baǵytta ishki ister organy júıesinde para alý faktileriniń jıi kezdesetinin jetkizdi. Osy negizde ótken jyly 8 qylmys anyqtalǵan.
Sonymen qatar, Mahambet aýdanynda jemqorlyqqa qatysty 6 fakt oryn alsa, Jylyoıda bilim salasy boıynsha 3 fakt tirkelgen.
Óńir basshysy Mahambet Dosmuhambetov aýdan ákimderine óz aýmaqtaryndaǵy ahýaldy baqylaýda ustaýdy tapsyrdy.
Oǵan qosa jıynda memlekettik satyp alý salasyndaǵy negizgi sybaılas jemqorlyq táýekelderdiń biri - taýarlar men qyzmetter baǵasyn negizsiz ósirý bolyp tabylatyny aıtyldy.
«2020 jyly satyp alý salasynda baǵalardy asyra ósirý faktisi boıynsha 31 buzýshylyq anyqtaldy. Engizilgen usynystar negizinde bıýdjettiń 364 mln.teńge qarjysy únemdeldi.
Monıtorıng júrgizý barysynda zań buzýshylyqtar kóbinese densaýlyq saqtaý jáne bilim berý salalarynda jıi oryn alatyndyǵyn kórsetti»,- dedi Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Aıdos Mamyt.
Al, «Atyraý-adaldyq alańy» jobalyq keńsesiniń jetekshisi Alfııa Ádıevanyń aıtýynsha, bıyl 32 turǵynnan resmı túrde, al resmı emes turǵyda 52 aryz shaǵym kelip túsken. 84 shaǵymnyń 13 bilim berý salasyna, 19 densaýlyq saqtaý salasyna, 18 azyq-túlik baǵalarynyń turaqsyzdyǵyna, 20-sy dári-dármek baǵalarynyń ósimi boıynsha bolǵan.
Osy turǵyda «Atyraý-adaldyq alańy» keleńsizdikterdi joıý maqsatynda birqatar jumystar júrgizgen. «Aıtalyq, oblystyq densaýlyq saqtaý basqarmasynyń basshysymen qala jáne aýdandardaǵy emhana, aýrýhanalardyń bas dárigerlerimen kezdesý ótkizildi. Qazirgi ýaqytta oblystyq Densaýlyq saqtaý basqarmasy basshysynyń qoldaýymen memleketten beriletin tegin dári-dármekterdiń ashyqtyǵyn qamtamasyz etý maqsatynda birlesken jumys júrgizilýde»,- dedi Alfııa Ádıeva.
«Sybaılas jemqorlyqpen kúres - Memleket basshysy Qasym-Jomart Toqaevtyń Joldaýynda aıryqsha atap aıtqan basty maqsattarynyń biri. Osyǵan oraı, sybaılas jemqorlyqpen kúresýdi úzdiksiz júrgizý, onyń jolyn kesý, aldyn alý joldaryn kúsheıtý, ádis-tásilderin árdaıym jetildirip otyrý qajet dep sanaımyn. Jemqorlyqqa qarsy kúreste barlyq tulǵalar zań men sot aldynda teń bolýyn eskerý qajet»,- dedi oblys ákimi Mahambet Dosmuhambetov.
Aımaq basshysy tıisti sala basshylarynan atalǵan keleńsizdikterdiń sebepterin surap, aldaǵy ýaqytta qatań baqylaýǵa alýdy mindettedi.
