Qyzylorda oblysyndaǵy 500-den astam mal aram ólgen Aral aýdanynda tótenshe jaǵdaı jarııalandy. Óńirdegi topyraqtyń qunarsyzdyǵy, maldyń ashtyqtan qyrylǵandyǵy synama nátıjesimen rastaldy. Aımaqta jem-shóp baǵasy kúnnen kúnge sharyqtap barady. Bul sharýalardyń jumysyn shatqaıaqtatýda, dep habarlaıdy «Astana» telearnasy.
Aımaqta mal azyǵynyń baǵasy aspandap tur. Bıyl jem-shópke memleket tarapynan beriletin sýbsıdııaǵa qol jetkizý qıyndaǵan. Qordalanǵan másele sharýalardyń shymbaıyna batyp tur.
«Qazir jońyshqa qymbattap jatyr. 600-700 den jońyshqa tabylmaı otyr. Kelesi orym 800 teńgeden deıdi. 3-shi orymda bizge berse 1000-1100 teńgeden bolady. Araldyń ózinde qazir 1200-1400 tg bolyp tur. Bıyl mal qatty aýyryp, ólip jatyr. Keshe de malymyz óldi, qysta biraz shyǵynǵa ushyradyq. Qazir taǵy shyǵynǵa ushyrap jatyrmyz», - deıdi sharýashylyq tóraǵasy Nurlan Bımanov.
Bıyl sýdyń tapshylyǵyna baılanysty shóptiń shyǵymy tómen. Ásirese, Aral óńirinde jaǵdaı qıyn. Kókke aýzy tımegen tórt túlik kóterem bop, 500-den astamy aram óldi. Olardan synama alǵan mamandar maldyń aýrýdan emes, ashtyqtan qyrylǵanyn rastap otyr.
«Mal ishetin qudyqtardan jáne qosymsha kólderden synamalar alyndy. Odan bólek, jylqylardan, ólgen jáne múıizdi iri qaradan synama alyndy. Oblystyq veterınarııalyq zerthanaǵa tapsyryldy. Sol teris nátıje kórsetti. Iaǵnı epızootııalyq ahýal turaqty. Aýrý joq. Qýańshylyqqa baılanysty, sońǵy jyldary jaýyn-shashynnyń az, qystyń qarsyz bolýyna baılanysty mal óte kúısiz túsken. Sonyń esebinen bolyp otyr», - dedi oblystyq Veterınarııa basqarmasynyń basshysy Shahmardan Qoıshybaev.
Búginnen bastap Aral aýdany boıynsha tótenshe jaǵdaı jarııalandy. Biraq mamandar mal shyǵyny ótelmeıdi deıdi. Al arnaıy bólingen qarjy birinshi kezekte, ashtyqtan teńselgen tórt túliktiń jem-shóp tasymalyna qajetti janar-jaǵarmaıǵa jumsalmaq. Jáne jaıylymdarda bitelgen sýattardyń kózin ashý jumystary qolǵa alynady.
