Soltüstık Qazaqstanda jaiylym tapşylyǧyna bailanysty auyl tūrǧyndary maldy jappai qyruǧa mäjbür. Mäsele jerdı käsıporyndarǧa egın eguge bergennen keiın paida boldy, - dep habarlaidy “Adyrna” ūlttyq portaly "Astana" telearnasyna sılteme jasap.
Telearna mälımetı boiynşa, Berezovka auylynda ekı jyl būryn jas maldy eseptemegende 200-ge juyq siyr bolǧan. Qazır şamamen 30 bas siyr qalǧan. Tūrǧyndar maldy qaida jaiaryn bılmeidı.
"Mende 10 bas jylqy bar, ony 300 şaqyrymdaǧy qūdama aparyp tastadym. Mal jaiatyn jer joq. Auylda tūramyz, jaiylym joq, şabyndyq joq, ainalanyŋ bärın jyrtyp tastady. Qysta beretın jem-şöp joq. Eşkımde şabyndyq joq. Menıŋ oiymşa, auylda qalǧan 30 bas maldan da eşteŋe qalmaidy. Soiady nemese basqa jaqqa aparady", - deidı auyl tūrǧyny Şarniias Rüstenov.Maksim İşuk auylǧa Petropavldan şaruaşylyq jürgızu üşın köşıp kelgen eken. Bıraq jaiylym tapşylyǧy jospardy būzǧan. Tūrǧyndar tıptı jeke qajetı üşın de mal baǧa almaityn jaǧdaiǧa jetken. Olardyŋ aituynşa jerdıŋ bärı egın eguge berılgen, deidı telearna tılşısı.
"Jerdıŋ bärıne egın egılgen. Siyrdy jaiatyn jer joq. Qoilardy Mamliut audanyna aparuǧa tura keldı, öitkenı basqa amal joq. Siyrlar süt bermeidı, būzaular da salmaǧyn joǧaltty. Auyl şaruaşylyǧyn damytu üşın nesie alǧym kelgen. Endı qaidaǧy nesie?" - dep şaǧymdanady er adam.Şeneunıkter jaiylym tapşylyǧy fermerlerdıŋ jappai egın eguıne bailanysty tuyndaǧanyn moiyndaidy.
"JŞS, şarua qojalyqtary baiqau arqyly jeŋıp aldy. Söitıp jerlerın jyrta bastady. Būryn ol jerler paidalanylmaǧan. Osyǧan bailanysty jaiylym jetıspeuşılıgı tuyndady", - deidı Qyzyljar audany Roşin auyldyq okrugı äkımı apparatynyŋ bas mamany Bibıgül Musina.Auyl şaruaşylyǧy basqarmasynda öŋırdıŋ jartysynda jaiylym tapşylyǧy baiqalatynyn tüsındırdı. Mysaly, Berezovkada 500 gektarǧa juyq jer jetıspeidı. Biyl şeneunıkter 77 myŋ gektar jerdı alyp, olardy jaiylym märtebesıne qaitarǧan. Berezovkaǧa keletın bolsaq, auyl şaruaşylyǧy basqarmasy maldy äskeri poligon arqyly aidap ötu mümkındıgı turaly kelıssöz jürgızuge uäde berdı.
