Aqtöbe qalasynda alǧaş ret oblystyq mamandandyrylǧan audanaralyq äkımşılık sot aşyldy dep habarlaidy "Adyrna" ūlttyq portalynyŋ tılşısı.
Äkımşılık sot memlekettık qyzmet körsetudıŋ barlyq zamanaui standarttaryn eskere otyryp, tehnologiialyq infraqūrylymmen jabdyqtalǧan. Onda aqparat ortalyǧy, kırıs keŋsesı jäne özıne-özı qyzmet körsetu ortalyǧynan tūratyn front-keŋse jūmys jasaidy. Sonymen qatar mūnda mediatorlar, advokattar men prokurorlarǧa arnalǧan jeke kabinetter de bar.
Äkımşılık sottyŋ aşyluyna qatysqan Aqtöbe oblysynyŋ äkımı Oŋdasyn Orazalin «Halyq ünıne qūlaq asatyn memleket» tūjyrymdamasyn ıske asyrudyŋ maŋyzdylyǧyna toqtaldy.
— Özderıŋızge belgılı, Memleket basşysy Qasym-Jomart Toqaev «Halyq ünıne qūlaq asatyn memleket» konsepsiiasyn jüzege asyru maqsatynda bırınşı kezekte azamattardyŋ ötınışterın zaŋ aiasynda sapaly qarau mäselesın qolǧa aludy tapsyrǧan bolatyn. Osyǧan orai zaŋnama jobasy äzırlendı jäne Qazaqstan Respublikasynyŋ Äkımşılık räsımdık-prosestık Kodeksı qabyldanyp, biylǧy jyldyŋ 1 şıldesınen bastap qoldanysqa engızılıp otyr.Bügınde ötınış bıldıru tärtıbın jeŋıldetu üşın jäne baqylaudy jaqsartuǧa arnalǧan «E-Ötınış» aqparattyq jüiesı ıske qosyldy. Osy jüiemen jūmys jasau üşın ekı ai ışınde jergılıktı atqaruşy organdardyŋ 2439 qyzmetkerı oqytudan öttı. Sondai-aq ötınış beruşıler üşın qolaily jaǧdai jasau maqsatynda halyqqa qyzmet körsetu ortalyqtarynyŋ bazasynda 16 front keŋse jūmysyn bastady, — degen oblys äkımı jaŋa äkımşılık Kodekstıŋ memlekettık organdar azamattardyŋ ötınışterın tiımdı, uaqytyly jäne sapaly qarauyna yqpal etetınıne senım bıldırdı.
Saltanatty şarada Aqtöbe oblystyq sotynyŋ töraǧasy Aslambek Merǧaliev äkımşılık sot jariia-qūqyqtyq qatynastardan tuyndaityn, iaǧni memlekettık organdar, azamattar men zaŋdy tūlǧalar arasyndaǧy daulardy şeşuge baǧyttalǧanyn, mamandandyrylǧan äkımşılık sot 1 şıldeden bastap qoldanysqa engızılgen zaŋ aiasynda jūmys jasaitynyn jetkızdı.
"Adyrna" ūlttyq portaly.
