«Elbasy jyluy»: 1000 otbasyǧa qoldau körsetıledı

Elımızde «Elbasy jyluy» atty keŋ auqymdy qaiyrymdylyq jobasy jalǧasyp jatyr. Halyqtyŋ zor yqylasyna bölengen igı şara Elbasynyŋ bastamasymen ūiymdastyryldy dep habarlaidy "Adyrna" ūlttyq portaly.   Būl joly atalǧan joba Taraz, Taldyqorǧan, Oral qalalarynda, sondai-aq, Almaty jäne Aqmola oblystarynda tūratyn 1 000 otbasyny qamtymaq.

Jobanyŋ maqsaty – az qamtylǧan, köpbalaly  jäne erekşe kütımdı qajet etetın balalary bar otbasylardy qoldau. Is-şara aiasynda mūqtaj otbasylarǧa ūn, kartop, jemıs, kürış, qaraqūmyq, şäi, qant, künbaǧys maiy siiaqty azyq-tülık pen gigienalyq zattar berıledı. Qaiyrymdylyq şarasyna ılıkken är otbasy 130 kilogramǧa deiın tauar alady.

Qazırgı uaqytta ūiymdastyruşylar qajet tauarlardy Aqmola, Almaty oblystarynyŋ az qamtylǧan tūrǧyndaryna jäne Taraz, Taldyqorǧan qalalarynda tūratyn äl-auqaty tömen jandarǧa jetkızıp ülgerdı. Mereke qarsaŋynda osyndai paidaly ärı qajettı syilyqtarǧa ie bolǧandar öz quanyştaryn jasyrmady. Öŋır tūrǧyndary aksiianyŋ ūiymdastyruşylary – "Nūrsūltan Nazarbaev" qory men «Degdar» qaiyrymdylyq qoryna şynaiy alǧystaryn jetkızdı.

"Nūrsūltan Nazarbaev" qory atqaruşy direktorynyŋ orynbasary Älkei Marǧūlanūly memleketpen qatar qoǧamdyq ūiymdardyŋ jūmysy da belgılı bır därejede halqymyzdyŋ äl-auqatyn jaqsartuǧa öz ülesın qosu tiıs dep sanaidy.

- Koronovirus pandemiiasy kezınde köp adamdar jūmystarynan aiyrylyp qaldy. Köp otbasylardyŋ jalaqasy belgılı bır mölşerde qysqaryp, būl jaǧdai olardyŋ äleumettık äl-auqatyna tıkelei äser ettı. Osy oraida bız «Elbasy jyluy» ideiasyn qolǧa alyp, ony qarqyndy jüzege asyrudamyz. Būl qaiyrymdylyq ıs-şara şıldenıŋ 10-15 deiın jalǧasyn tabady. Elbasynyŋ özı de būl qozǧalystyŋ bastauyna batasyn bergen edı. Būl jūmys endı toqtamai, jalǧasa beru kerek. Öitkenı būl joba adamdarǧa senım ūialatyp qana qoimai, olardyŋ ruhyn köterıp, qoǧamnyŋ qamqorlyǧyn sezınuge mümkındık beredı,- dep mälımdedı ol. «Degdar» qorynyŋ direktory Laura Ahmetova mälımdegendei, «Elbasy jyluy» jobasynyŋ äleumettık män-maŋyzy zor.

- Jalpy, būl aksiia ekınşı ret ötkızılıp jatyr, alǧaş ret joba osy jyldyŋ säuırınde ūiymdastyrylǧan edı. Osy uaqyt aralyǧynda bız būl jobanyŋ qoǧam üşın qanşalyqty maŋyzdy ekendıgıne köz jetkızdık. Halqymyz özara kömek beruge, qajet kezde qol ūşyn sozuǧa qaşanda daiyn. Būl igı dästür halqymyzdyŋ boiyndaǧy – asyl qasietterdıŋ bırı. Osy qūndylyqtardyŋ negızınde «Elbasy jyluy» jobasy düniege keldı. Būl bastama özge ūiymdarǧa jäne barşa qazaqstandyqtarǧa jarqyn ülgı bolyp, mındettı türde jalǧasyn tabady dep senemın. Bız ärdaiym qamqorlyqqa mūqtaj, jürek jyluyna zäru jandarǧa kömektesuga daiynbyz,- dedı Laura Ahmetova.

Eske salsaq, äleumettık tūrǧydan osal otbasylarǧa taratylatyn azyq-tülık tauarlarynyŋ jalpy salmaǧy – 120 tonna. Auqymdylyǧy jaǧynan teŋdesı joq aksiia älı de jalǧasuda. Is-şaranyŋ ūiymdastyruşylary – "Nūrsūltan Nazarbaev" qory men «Degdar» qaiyrymdylyq qory, sondai-aq jobaǧa "LIDER KZ" volonterlık qozǧalysynyŋ müşelerı atsalysuda.

"Adyrna" ūlttyq portaly.