Maŋǧystau oblysynda QR Täuelsızdıgınıŋ 30 jyldyǧy aiasynda 153 şara ötedı. Būl turaly Qoǧamdyq kommunikasiia ortalyǧynda ötken brifingıde Maŋǧystau oblysy ışkı saiasat basqarmasy basşysynyŋ orynbasary Batyrhan Quanyşbekov mälım ettı, dep habarlaidy «Adyrna» ūlttyq portaly Maŋǧystau oblysynyŋ qoǧamdyq kommunikasiia ortalyǧyna sılteme jasap.
Onyŋ aituynşa, negızgı maqsat Täuelsızdıktıŋ 30 jyldyq mereitoiynyŋ maŋyzy men Tūŋǧyş Prezident – Elbasy N.Ä.Nazarbaevtyŋ Täuelsız Qazaqstannyŋ qalyptasuy men damuyndaǧy rölın jetkızu arqyly qazaqstandyqtardyŋ patriottyq sezımın küşeitu.
«Būl baǧytta artyq şyǧynǧa alyp keletın, imidjdık, bır rettık şaralar qysqartyldy. Halyqqa qajettı, äleumettık salada maŋyzdy jobalarǧa den qoiyldy. Şılde aiynda «Astana künı. Nūr-Sūltan – tabys pen örkendeudıŋ simvoly» taqyryptyq jelısı boiynşa oblystyŋ barlyq qalalary men audandarynda josparlanǧan şaralar tiıstı deŋgeide ötkızılude. Qazırgı pandemiialyq ahualdyŋ naşarlauyna bailanysty köptegen şara tek onlain formatta ötkızılıp otyr. Sonymen qatar, 27 öndırıstık jäne äleumettık-mädeni nysandy halyq igılıgıne tapsyru josparlandy. Qazır bırqatary paidalanuǧa berıldı», - dedı Batyrhan Quanyşbekov.Sondai-aq mereitoi aiasynda oblys äkımı «El igılıgı üşın!» jobasyn bekıtıp, qūjat tiıstı organdarǧa oryndau üşın joldandy. Aita keteiık, joba 10 taqyrypqa bölıngen jäne 74 tarmaqtan tūrady. Atap aitqanda, «Bılım - tausylmas qazyna», «Sport – densaulyq kepılı», «Denı sau ūlt - quatty memleket», «Mädeniet - ūlttyŋ beinesı», «Qaiyrymdylyq – ızgı qasiet», «Otbasy – basty qūndylyq», «Jastar – täuelsız eldıŋ tıregı», «Basty mındet – halyqqa qyzmet», «Auylym - altyn besıgım», «Halyq üşın qolaily orta».
«Mereitoiǧa orai «Jaŋarǧan Jaŋaözen» jobasy jüzege asyryluda. Joba Jaŋaözen qalasynyŋ äleumettık-infraqūrylymyn damytudy, äleumettık-mädeni, bılım, sport şaralaryn ūiymdastyrudy közdeidı», - dedı Batyrhan Quanyşbekov.
"Adyrna" ūlttyq portaly
