Úsh týysyn pyshaqtaǵan: sot úkimi shyqty

4719
Adyrna.kz Telegram

Petropavlda úsh týysyn pyshaqtap, taǵy ekeýiniń ómirine qastandyq jasaǵan 30 jastaǵy er adamǵa sot úkimi shyqty, dep habarlaıdy «Adyrna» ulttyq portaly QazAqparatqa silteme jasap.

Soltústik Qazaqstan oblysyndaǵy qylmystyq ister boıynsha mamandandyrylǵan aýdanaralyq sot bir úıli jannyń qanyn moınyna júktegen qanisherge úkim shyǵardy. «Óltirý» jáne «Ómirge qastandyq jasaý» baptary boıynsha aıyp taǵylǵan 30 jastaǵy Bekbolat Ǵabdýllın ómir boıyna bas bostandyǵynan aıyryldy.

Qaıǵyly jaǵdaı naýryz aıynda Petropavlda boldy. Tergeý málimetterine sáıkes, almatylyq Bekbolat Ǵabdýllın naýryzdyń 9-y Nur-Sultan qalasynan Petropavlǵa týystarynyń úıine qonaqqa keledi. Er adam esh jerde jumys istemegen. Qumar oıynǵa salynyp, qaryzǵa belsheden batqan eken.

«Jábirlenýshilerdiń aıtýynsha, Ǵabdýllın úı ishin aralap, úıdegi qundy zattarǵa qatysty qyzyǵýshylyq bildirgen. Osydan-aq onyń týystaryn tonamaq bolǵany baıqalady. Úı ıelerine pyshaqpen umtylǵanda da maǵan aqsha kerek dep aıqaılaǵan», - deıdi isti qaraǵan sýdıa Sergeı Vıktorenko.

Naýryzdyń 10-y kúni Ǵabdýllın araqqa sylqııa toıyp kelip, saǵat 02.30 shamasynda shabýylyn bastaǵan. Aldymen nemere inisin temeki shegeıik degen syltaýmen shaqyryp alyp, arqasyna birneshe ret pyshaq suqqan. jigit kómekke shaqyrý úshin ekinshi qabatqa ájesiniń bólmesine júgiredi. Ondaǵy telefon arqyly qarama-qarsy turatyn týystaryna telefon soǵyp, esinen tanyp qalady. Ǵabdýllın onyń artynan júgirip kirip, uıqydaǵy qarııany da pyshaqtaıdy. Keıin 48 jastaǵy tátesine de pyshaq suǵady.

«Sottalýshynyń jasaǵan qylmysy óte aýyr bolǵandyqtan sot ony qoǵam úshin qaýipti dep tanydy. Sol sebepti Ǵabdýllın ómir boıyna bas bostandyǵynan aıyryldy. Jazasyn qylmystyq-atqarý júıesiniń tótenshe qaýipsizdik mekemesinde óteıdi», - deıdi Sergeı Vıktorenko.

Sondaı-aq Ǵabdýllınnen jábirlenýshilerdiń paıdasyna 14,8 mln teńgeden astam materıaldyq jáne moraldyq shyǵyn óndirildi.

"Adyrna" ulttyq portaly

Pikirler