Baizaq audanynda bolǧan oqiǧaǧa bailanysty qūrylǧan oblystyq jedel ştabtyŋ jūmysy jalǧasuda. Būl turaly Jambyl oblysy äkımdıgınıŋ baspasöz qyzmetı jazdy, dep habarlaidy «Adyrna» tılşısı.
Ştab müşelerı ǧylymi-zertteu qyzmetkerlerımen bırge ırgedegı 3 eldı mekendegı tūrǧyn üiler men äleumettık nysandardy tügeldei zerttedı. Qazırgı taŋda jöndeudı qajet etetın 118 jyljymaityn mülık anyqtalsa, onyŋ 106-sy tūrǧyn üi, 12-sı kommersiialyq nysan. Būl turaly oblys äkımı Berdıbek Saparbaev BAQ ökılderıne bergen sūhbatynda jan-jaqty toqtaldy.
Anyqtalǧan 106 tūrǧyn üidıŋ 35-sı kürdelı jöndeuden ötetın bolsa, qalǧan 71-ı jeŋıl zaqymdalǧan, olar da qalpyna keltırıledı. Barlyq jūmystarǧa Ükımet tarapynan qaralatyn jäne qosymşa jergılıktı biudjet, öŋırdegı demeuşıler qarajattary jūmsalady.
- Bügın bır üidıŋ kürdelı jöndeu jūmystary bastalsa, qalǧan üiler boiynşa qūrylysşylar erteŋnen bastap ıske kırısedı. Ekı aidyŋ ışınde barlyq üidı qalpyna keltıremız dep özımızge mındetteme alyp otyrmyz. Oǧan bızdıŋ mümkındıgımız de, qūrylysşylar küşı de jetkılıktı. Äleumettık nysandarǧa qatysty toqtalsaq, 3 mektepke zaqym kelgen. Äsırese, qatty zardap şekkenı – Jıbek Joly auylyndaǧy bılım ordasy. 118 bala oqityn bılım mekemesınıŋ ırgesı 1956 jyly qalanǧan. Eskı mekteptıŋ ornyna jaŋa ǧimarat saluǧa şeşım qabyldandy. Auyl halqy sanynyŋ ösımı eskerılıp, Ükımetke 150 oryndyq jaŋa mekteptıŋ qūrylysy boiynşa ūsynys joldaimyz. Salynatyn jer belgılendı, qūjattary barynşa qysqa uaqytta daiyndalady. Jeŋıl zaqymdalǧan Üşbūlaq men Bazarbai auyldaryndaǧy mektepter demeuşıler esebınen qalypqa keltırılude. Olar bırınşı qyrküiekke deiın daiyn bolady. Däl sondai bır medisinalyq punkt te bır apta ışınde tolyǧymen jöndeledı,– dedı oblys äkımı.Oblys äkımınıŋ aituynşa, temır jol, avtojoldar qalypty rejimde jūmys jasauda. Tūrǧyndardyŋ barlyǧy üilerıne oralǧan. Üilerı kürdelı jöndeuden ötetın Qainar auylynyŋ tūrǧyndary uaqytşa baspanamen, azyq-tülıkpen qamtamasyz etıledı. Qazırgı taŋda Taraz qalalyq ortalyq auruhanada 28 nauqas em aluda. Onyŋ 4-ınıŋ jaǧdaiy ortaşa auyr. Olarǧa qajettı barlyq medisinalyq kömekter körsetılude. Ömırlerıne eşqandai qauıp tönıp tūrǧan joq. Därı-därmekter men därıgerler jetkılıktı. Jalpy, medisinalyq kömekke jügıngen türlı deŋgeide jaraqat alǧan 98 adamnyŋ ışınde qarapaiym tūrǧyndar joq, barlyǧy äskeriler men tötenşe jaǧdai salasynyŋ qyzmetkerlerı. Qazırgı taŋda habarsyz ketkender ızdestırılude. Oblys äkımı olardyŋ ata-analary men tuǧan-tuysqandarymen kezdesıp, tiıstı tüsındırme berdı. Izdeu jūmystaryna äskeriler, TJD mamandary, kinologtar, tiıstı mamandar, qyzmettık itter, atty adamdar jūmyldyrylǧan. Arnaiy dron qūrylǧysynyŋ mümkındıgı de barynşa paidalanyluda. Qazırgı taŋda 180 adam, 40 şaqty tehnika jūmys jasauda.
«Adyrna» ūlttyq portaly
