Jambyl TJD qyzmetkerlerı Baizaq audanyndaǧy äskeri qoimada bolǧan jarylystan qaza tapqan ärıptesterın eske aldy, dep habarlaidy «Adyrna» tılşısı.
Jänıbek Tūrmanov – Taraz qalasynyŋ №1 mamandandyrylǧan ört söndıru bölımınıŋ ört söndıruşı-qūtqaruşysy, öz ısınıŋ şeberı, naǧyz ot jauyngerı, asyl jar ärı ekı balanyŋ aiauly äkesı.
«Jänıbek sol künı kezekşı qarauyl qūramynda bolǧan. Oqiǧa ornyna, iaǧni Baizaq audanyna alǧaşqylardyŋ bırı bolyp keldı. Özınıŋ qyzmettes dosy Didar Umirzakovpen bırge ört avtosesternasynan lafettık oqpandy qoldanyp, örttı söndırmek bolǧan sätte alǧaşqy jarylys bolǧan. Sol tünı ol Taraz qalasyndaǧy auruhanalardyŋ bırıne jetkızıldı. Osydan keiın, bırneşe künnen soŋ arnaiy bortpen Nūr-Sūltan qalasynyŋ Travmotalogiia jäne ortopediia ǧylymi-zertteu institutyna auystyryldy. Bız ärıptesımızdıŋ ortamyzǧa oraluyn kütken edık. Bıraq ökınışke qarai, 2021 jyldyŋ 11 qyrküiegınde taŋǧy 4-te ol myna jaryq düniemen qoş aitysyp kete bardy. Bız üşın Jänıbek özınıŋ jarqyn külkısımen este qalary anyq. Ony "Djoni" dep erkeluşı edık. Ärqaisysymyzǧa keremet dos bola bıldı»,– dep jazdy baspasöz qyzmetı.Joldastarynyŋ aituynşa, Jänıbek ärqaşan ört söndıru ısınde bırınşı bolyp, jūmysty jauapkerşılıkpen oryndaǧan. Onyŋ aldaǧy bolaşaqqa josparlary da köp bolǧan.
«Pogondaǧy jūldyzdaryn köbeitkısı keldı. Tıptı jaqyn aralyqta ofiser de bolar edı. Öitkenı, Jänıbek biyl ǧana Sankt-Peterburg qalasynyŋ Memlekettık örtke qarsy qyzmet universitetın bıtıgen bolatyn. Ol özınıŋ azamattyq qorǧau organdaryndaǧy qyzmetın 2013 jylǧy qaŋtarda Soltüstık Qazaqstan oblysynyŋ örtke qarsy qyzmet garnizonynda bastady. Sodan keiın 2015 jyly Jambyl oblysyna auystyryldy. Osy 6 jyldyq mınsız qyzmetı üşın 28 marapatqa ie boldy»,– dep eske aldy ärıptesterı.
«Adyrna» ūlttyq portaly
