Qazaqstandyq ǧalymdar Alsgeimer jäne Parkinson aurularyna qarsy därı jasap jatyr, dep habarlaidy «Adyrna» tılşısı BǦM baspasöz qyzmetıne sılteme jasap.
Qorqyt Ata atyndaǧy Qyzylorda universitetınıŋ ǧalymdary Europalyq Odaq grantyn jeŋıp aldy. Olar Portugaliia, Niderlandy, Daniia, Resei, Belarus jäne Ukraina ǧalymdarymen bırlesıp, äzırleuşıler tobyna kırdı.
Därılık preparatty daiyndau üşın Qazaqstannyŋ oŋtüstık aimaqtarynda ösetın tüie tıkenegı paidalanylady.
Otandyq zertteuşıler ösımdıkten aterosklerozdyŋ bastapqy formalaryn emdeude tiımdı biologiialyq belsendı zattardy aldy.
«Bız därılık ösımdık – tüie tıkenegıne zertteu jürgızu üşın Bılım jäne ǧylym ministrlıgı Ǧylym komitetınıŋ grantyn aldyq. Sodan keiın bız onyŋ qūndy qasietterın anyqtadyq. Bız özımız aşqan jaŋalyqty Portugaliiada tanystyrdyq. Olar bızdıŋ ǧylymi äzırlemelerımızge qyzyǧuşylyq tanytyp, yntymaqtastyq ūsyndy. Jobany oryndau kezınde flavonoidtardyŋ suda eritın formalaryn alamyz, olardy kömırtektı nanomaterialdarmen modifikasiialaimyz. Şeteldık ǧalymdar jedel test ötkızıp, bız anyqtaǧan nanomaterialdar Alsgeimer jäne Parkinson aurularynyŋ damuyna kedergı keltıretının jäne pasientterdı aurudyŋ alǧaşqy kezeŋderınde emdeuge kömektesetının rastady. Sonymen qatar tüie tıkenegınen alynǧan modifikasiialanǧan biologiialyq belsendı zattardyŋ janama äserlerı joq jäne adam densaulyǧy üşın qauıpsız bolyp tanyldy», – dedı Qorqyt Ata atyndaǧy Qyzylorda universitetınıŋ zertteuşı-professory Nūrbol Appazov.Qyzylordalyq ǧalymdar şeteldık ärıptesterımen bırge baiqauǧa qatysu üşın ötınış berıp, Horizon-2020 baǧdarlamasy boiynşa Europalyq Odaqtyŋ grantyn jeŋıp aldy. Endı ǧylymi top klinikaǧa deiıngı jäne klinikalyq zertteuler jürgızudı josparlap otyr. Qorqyt ata atyndaǧy Qyzylorda universitetınıŋ ǧalymdarynda basqa da köptegen innovasiialyq jobalar bar, olardyŋ bır bölıgı kommersiialandyrylǧan. Mäselen, himik ǧalym, professor Nūrbol Appazov qara altyndy mūnai şlamynan öŋdeudıŋ tiımdı ädısın oilap tapty. Joba Qūmköldıŋ ırı mūnai-gaz ken oryndarynyŋ bırınde engızıldı. Qazaqstandyq ǧalymnyŋ jobasy köptegen şeteldık jobalar arasynan top jaryp, eŋ ünemdı jobalardyŋ bırı retınde tanyldy. Ǧalymdardyŋ kürış sabanynan selliuloza alu jobasy qaǧaz öndırısınde qoldanysqa engızıldı. Būryn astyq jinap, öŋdegennen keiın myŋdaǧan tonna kürış sabany men qauyzy qoldanylmai örteletın. Ǧalymdardyŋ jūmysynyŋ arqasynda ekologiiaǧa taza şeşım tabyldy. Qazır kürış sabanynyŋ dänderı men qabyǧynan qaǧaz, belsendırılgen kömır jäne tyŋaitqyş - biochar jasalady. Soŋǧy üş jylda qyzylordalyq ǧalymdar 60 bıregei ǧylymi äzırlemenı patenttedı. 10-nan astam innovasiialyq jobany kommersiialandyru josparda bar.
«Adyrna» ūlttyq portaly
