Ómirqul Aınııazov: Qazaqtar soǵys bolsa da toı jasaıdy

1867

27 qyrkúıekten bastap, elimizde úılený toılary men merekelik is-sharalardy ótkizýge resmı túrde ruqsat berildi. Bul jańalyqty qarapaıym halyqtan bólek, óner juldyzdary da qýana qabyldady. Qazaq estradasynyń kórnekti ókili Ómirqul Aınııazov aldaǵy toılardyń karantındegi toılardan qandaı aıyrmashylyqtary bolatynyn aıtyp, pandemııa kezinde de jumyssyz qalmaǵanyn jetkizdi, dep habarlaıdy "Adyrna" ulttyq portaly KAZ.NUR.KZ portalyna silteme jasap.

- Toı ótkizýge ruqsat bergenin, árıne, qýanyshpen qabyldadyq. Alaıda, karantın kezinde de toıǵa, kishigirim otyrystarǵa shyǵyp júrdik. Muny bári de biletin shyǵar. Osy oraıda aıta keteıin, ánshilerdi karantınde toıǵa bardy dep kinálaýdyń qajeti joq. Aldymen karantınde toı jasaǵandar týraly oılaý kerek. Eger toıǵa shaqyrtý kelmese, eshbir ánshi barmaıdy. Al shaqyrtýdy toı ıeleri jiberedi. Sondyqtan, máselege barlyq jaǵynan qaraǵan durys dep bilemin.

- Jalpy, ózim karantınde qarap qalǵan joqpyn. Basqa da jumyssyz áriptesterim ne istegenin bilmeımin, jeke ózimniń aılyǵym úzilgen joq. Sebebi, biraz jyldan beri Almaty oblysyndaǵy Súıinbaı atyndaǵy fılarmonııada jumys isteımin. Karantınde aılyǵym toqtaǵan da joq, azaıǵan da joq, sol qalpynda túsip otyrdy. Aıtarlyqtaı qınaldym dep aıta almaımyn. Tipti, bylaıǵy kezde qolym tımeıtindikten, bos ýaqytty paıdalanyp óz bıznesimdi ashyp aldym. Mal sharýashylyǵyna bet buryp, kópten oıda júrgen maqsatymdy oryndadym, - deıdi ánshi.

Sondaı-aq, Ómirqul Aınııazov kópshilik sekildi meıramhananyń artqy esiginen emes, aldyńǵy jaǵynan kiretinine qýanatynyn aıtty.

- Buǵan deıin restorannyń artqy jaǵynan kirip keldik. Qaptalynan da, basqa jerinen de kirdik. Artqy jaqtan kirgende toıdyń ber jaǵynda bolyp jatqan dúnıelerdiń bárin kóredi ekensiń. Kýhnıa bar, basqa da sharýashylyq bólmeleri bar. Solardyń bárin basyp ótý maǵan yńǵaısyzdaý edi. Endi restorannyń aldynan kiretinimizge qýanamyn. Negizi, qazaq eshqashan toısyz otyra almaıdy. Qazaq qandaı zaman bolsa da qyzyn uzatyp, ulyn úılendiredi. Qazaqtar soǵys bolsa da toı jasaıdy. Sondyqtan, mundaı qıyn kúnder de kórgen tústeı umtylatynyna senemin. Karantınde dombyramdy alyp, úlkendi-kishili toılarda, betasharlarda, mereıtoılarda boldym. Muny esh jasyrmaıyn. Toıǵa barǵanym ras. Jalpy, kópshilik halyq qarap otyrǵan joq, toıǵa bardy, - deıdi óner ıesi.

Esterińizge sala keteıik, 27 qyrkúıekten bastap elde karantındik shekteýler jeńildetildi, saltanatty jáne otbasylyq sharalarǵa ruqsat etildi. Sondaı-aq konferenııalar, forýmdar jáne basqa da buqaralyq sharalardy, kórmelerdi ótkizýge ruqsat berildi. Buǵan qosa, taza aýada marafon uıymdastyryp, kórermenderdiń qatysýymen sporttyq sharalar ótkizýge bolady.

"Adyrna" ulttyq portaly

 

Pikirler
Uqsas jańalyqtar