Nūr-Sūltanda 50 jastan asqan bır top äiel Eŋbek ministrlıgınıŋ aldynda mitingke şyqty. Qoldaryna «Zeinetke şyǧu jasyn 58 jasqa qaitarudy talap etemız» dep jazylǧan plakat alyp şyqqan olar özderı jazǧan gimndı oryndap, «bilık zeinetke şyǧu jasyn 58 jasqa qaitarsyn» dep talap qoidy dep habarlaidy "Adyrna" ūlttyq portaly "31 arnaǧa" sılteme jasap.
Eŋbek ministrılıgı ǧimaratynyŋ aldyna jinalǧan, basyna aq oramal taqqan äielder qoldaryna «Zeinetke şyǧu jasyn 58 jasqa qaitarudy talap etemız» degen plakatty ūstap şyqqan. Olar bilıktıŋ nazaryn audaratyn basqa amal qalmaǧanyn aitady. Öitkenı, būǧan deiın «Nūr Otan» partiiasyna, Prezidentke jäne basqa da qūzyrly organdarǧa jazǧan hattaryna jauap almapty.– 50 jastan keiın densaulyq naşarlaidy, jūmys ta tabyla bermeidı. Zeinetke şyǧu jasyn ūlǧaitqanda adamdardyŋ ömır süru jaǧdaiyn eskermegen. Bızdı estısın dep ädeiı Qarttar künınde osylai mitingıge şyqtyq. Äielderdıŋ zeinetke şyǧu jasy būrynǧydai 58 jas boluyn talap etemız, — deidı Maiken Bigarystanova.
Al Kenje Sembaevanyŋ aituynşa, 50 jastan keiın äiel bolsyn, erkek bolsyn, auyrady, eŋbekke qabılettılıgı tömendeidı.— Elımızde äielderdıŋ bärı kabinette ruchka ūstap, kompiuterdıŋ aldynda otyrmaidy. Köp äielder eden juady, köşe sypyrady, auyr jūmys jasaidy. Olarǧa öte qiyn 63-ke deiın jetu. Zeinetke şyǧu jasyn bızdıŋ ükımet Europaǧa qarap bekıttı. Al bızdıŋ ömır süru jaǧdaiymyz Europaǧydan alys, — deidı ol. Ministrlık aldynda ändetıp tūrǧan äielderdı polisiia qyzmetkerlerı baqylap tūrǧan. Bırazdan keiın olardy ministrlık qyzmetkerlerı ǧimaratqa kırgızgen soŋ, bır top äieldıŋ talaby ūzaq diskussiiaǧa ainaldy.
– Bız mäseleden qaşpaimyz. Sızderdıŋ talabyŋyz boiynşa vise-ministr Aqmadi Sarbasov jūmys ıstep jatyr. Ol qazır ıssaparda jür. Talabyŋyz eskerusız qalmaidy, — dedı jinalǧandarǧa QR Eŋbek jäne halyqty äleumettık qorǧau ministrlıgı zeinetaqymen qamtamasyz etu departamentınıŋ direktory Viktoriia Şegai.Al Eŋbek jäne halyqty äleumettık qorǧau ministrınıŋ keŋesşısı Şyŋǧysbek Sūltanbekov äielderdıŋ talabyn ministrge jetkızemın dep uäde ettı. Dese de, zaŋdy özgertu üşın 3-4 ai uaqyt ketetının eskerttı.
"Adyrna" ūlttyq portaly.
