Elimizde destrýktıvti dinı aǵym belgilerine tyıym salynbaq
Dinı qyzmet týraly zań jobasynda destrýktıvti dinı aǵymdardyń syrtqy kórinisi bolyp tabylatyn atrıbýttar, mysaly qaýǵa saqal men qysqa balaq, sondaı-aq betti jaýyp turatyn kıim-keshekti qoǵamdyq oryndarda kıip júrýge shekteý qoıylmaq. Bul týraly din isteri jáne azamattyq qoǵam mınıstri Nurlan Ermekbaev aıtty, dep habarlaıdy Sputnik Qazaqstan tilshisi.
Búgin májiliste Nurlan Ermekbaev dinı qyzmet jáne dinı birlestikter máseleleri boıynsha zań jobasyn tanystyrdy. Zań jobasyndaǵy ózgeristerdiń biri – bet-álpetti jaýyp turatyn kıimdi qoǵamdyq oryndarda kıip júrýge jáne destrýktıvti dinı aǵymdardyń syrtqy kórinisi bolyp tabylatyn atrıbýttardy, kıim-keshekti qoǵamdyq oryndarda paıdalanýǵa, kıip júrýge jáne taratýǵa, sondaı-aq olardyń ıdeologııasyn taratýǵa shekteý qoıý.
"Zań jobasynda destrýktıvti dinı aǵym belgilerin paıdalaný jáne kópshilikke kórsetýge tyıym salý kózdelip otyr. Olar zańnamalyq aktide bekitiledi. Bul belgilerdiń ishine tek syrtqy ǵana emes, ıdeologııalyq, psıhologııalyq, uıymdastyrýshylyq ári dinı joralǵy belgileri kiredi. Destrýktıvti dinı aǵymdardyń syrtqy belgilerine ıslamdaǵy radıkaldy aǵymdarǵa tán dúnıeler jatqyzylýy múmkin. Mysaly, betti jaýyp turatyn kıim, balaǵy qysqa shalbar, saqal bolýy múmkin. Olar jeke-jeke emes, birge qarastyrylady. Arnaıy saraptama arqyly olardyń destrýktıvti aǵymǵa jatatyny-jatpaıtynyna baǵa beriledi", — dedi Ermekbaev jýrnalısterge.
Onyń aıtýynsha, bul belgiler zańnamalyq normatıvtik-quqyqtyq aktide bekitiledi.
"Bul aktide eskızder nemese fotosýretter berilýi de múmkin. Usynys boıynsha, bul IIM, UQQ, Din isteri jáne azamattyq qoǵam mınıstrliginiń birlesken buıryǵy bolady. Mamandar bul belgilerdiń destrýktıvti dinı aǵymǵa jatatyny-jatpaıtynyn anyqtaıdy. Iaǵnı, teris aǵymnyń birneshe syrtqy belgisi bar azamatpen tildesip, onyń dinı kózqarasy jaıly sóılesedi. Tek qajet bolǵan jaǵdaıda oǵan eskertý jasalady", — dedi mınıstr.
https://sputniknews.kz
