Senatorlar ükımetten "bankke nesiesın tölei almaǧan azamattardyŋ jaǧdaiy jaqsarǧanşa qaryzdy töleu merzımın keiınge şegerudı" sūrady, dep habarlaidy “Adyrna” ūlttyq portaly “İnformbiuro” jaŋalyqtar qyzmetıne sılteme jasap.
Senatorlar halyqtyŋ kepılde tūrǧan baspanasynyŋ "paidasyn" bank qyzmetkerlerı köredı deidı. Öitkenı auksiondaǧy mülıktı köbıne naryqtaǧy baǧasynan äldeqaida arzanǧa jeke tūlǧalar emes, bank satyp alady. Mysaly, 2015-2018 jyldar aralyǧynda auksionǧa şyǧarylǧan mülıktıŋ 78 prosentın qarjy ūiymdary satyp alǧan. Auksion degen aty bolmasa, oǧan köbıne bank qyzmetkerlerınıŋ özderı qatysady. Bas prokuraturanyŋ özı kepıldegı mülıktı elektrondy satu kezınde bäsekelestıktıŋ bolmaitynyn mälımdedı.
Deputattar endı auksionǧa bankter qatyspaityndai zaŋ qabyldaiyq dep otyr. Sondai-aq, atyndaǧy jalǧyz baspanasy kepılde bolyp, nesiesın tölei almaǧan azamattardyŋ üiın eşkım tartyp almasyn deidı.
“Olardy qyspaqqa ala bermei, olar qarjylyq jaǧdaiyn tüzegenşe bır mümkındık jasaudy bankter qarau kerek. Jalǧyz üiınıne aiyrylyp jatqan azamattar, köp balaly otbasylardyŋ jaǧdaiyn bılemız. Osyǧan bailanysty mäselenı şeşu kerek”, – deidı QR Parlamentı senatynyŋ deputaty Läzzat Süleimen.
Deputattar ükımetten qaryzyn tölei almaǧannyŋ özınde, jalǧyz baspanasy bar azamattar sol üide uaqytşa qaluǧa nemese memlekettık baǧdarlamamen salynǧan päterde tūruǧa mümkındık berudı sūrap otyr. Sondai-aq, jeke sot oryndauşylarynyŋ qyzmetıne memlekettık baqylaudy küşeiteiık dedı.
Iаǧni, jeke sot oryndauşysy jūmysyn dūrys oryndamasa jauapkerşılıkke tartyluy tiıs. Eger bılıktılıgı artatyn bolsa, säikesınşe jauapkerşılıgı de küşeisın deidı. Senatorlardyŋ sözınşe bankke qaryzyn tölei almaǧan azamattardy jeke sot oryndauşylary şekten tys qyspaqqa alady.
Aita keteiık, biyl şılde men qyrküiek aralyǧynda elımızde qozǧalǧan 7 myŋnan astam äkımşılık ıstıŋ 2338-ı jek sot oryndauşylaryna qatysty bolǧan.
“Adyrna” ūlttyq portaly
