Şymkent halyqaralyq äuejaiynda Serbiiada ötken bokstan eresekter arasyndaǧy älem chempionatynyŋ kümıs jüldegerı Mahmūd Sabyrhandy zor qūrmetpen qarsy aldy.
Bylǧary qolǧap şeberın kütıp aluǧa qala äkımınıŋ orynbasary Maqsūt İsahov, Sidnei olimpiadasynyŋ kümıs jüldegerı Mūhtarhan Dıldäbekov pen qalalyq dene şynyqtyru jäne sport basqarmasynyŋ basşysy Bauyrjan Tūmanbaev, sportşynyŋ ata-anasy, tuystary men bapkerlerı, janküierlerı jinaldy.
– Älem chempionatynan kümıspen oralsam da, ülken qūrmetpen kütıp alǧan, tıleules bolǧan barşa janküierge rahmet. Būl älem bırınşılıgıne äu basta altyn alamyn dep barǧanmyn. Kümıs medal būiyrdy, oǧan da täuba. Finalǧa deiın 4 jekpe-jek ötkızdım. Barlyǧynda basymdyq tanyttym. Al aqtyq syndaǧy japon boksşysyna qai jaǧynan ese jıbergenımdı bılmeimın. Bıraq üstem boldy. Ärine, būl jarys maǧan ülken täjıribe syilady. Būl bastamasy ǧana. Alda talai dübırlı syn kütıp tūr. Aldaǧy jyly Aziia oiyndary ötedı. Köp ūzamai Taşkentte lisenziialyq älem chempionatynyŋ jalauy jelbıreidı. Sol bäsekelerge daiyndalyp, osy joly ketken esenı qaitaramyz, - dedı ol.Aita keteiık, Qazaqstan qūramasy Belgradtaǧy älem chempionatynda bes jüldege ie boldy. Qūrama sapynda Temırtas Jüsıpov (48 kelı) pen Säken Bibosynov altyn, Mahmūd Sabyrhan (54 kelı) men Serık Temırjanov (57 kelı) kümıs medal enşıledı. Al ūlttyq qūrama kapitany, 67 kelıdegı Abylaihan Jüsıpov qola medalǧa qol jetkızdı. Jalpy komandalyq esepte Kuba top jardy. «Bostaŋdyq aralynyŋ» ökılderı 3 altyn, 2 qola medalǧa qol jetkızdı. Ekınşı orynǧa Qazaqstan ornalassa, üzdık üştıktı AQŞ qūramasy qorytyndylady. Olardyŋ enşısınde 2 altyn, 2 kümıs medal bar.
Azamat JAPPAR Foto Serık QOSAEV ŞYMKENT KELBETI
