Nur Otan-da jolaýshylar jáne júk tasymaly máseleleri talqylandy

2215
Adyrna.kz Telegram

Indýstrııa jáne ınfraqurylymdyq damý mınıstrliginiń jáne jergilikti atqarýshy organdardyń jolaýshylar jáne júk tasymalyn damytý baǵytyndaǵy jumysy kóńil kónshitpeıdi. Bul týraly «Nur Otan» partııasy Partııalyq baqylaý komıtetiniń kezekti otyrysynda belgili boldy.

Qazaqstan avtomobıl konventiniń prezıdenti Marat Berqalıevtiń aıtýynsha, zań jergilikti atqarýshy organdardy tasymaldaýshy kompanııalardyń shyǵyndaryn sýbsıdııalaýǵa mindettegenimen, kóptegen óńirler bul talapty oryndaýǵa asyǵar emes. Nátıjesinde, tasymaldaýshylarǵa aınalym qarajaty jetispeı, kólik júrgizýshiler men mehanıkterge jalaqy tóleı almaı, sonyń saldarynan únemi maman tapshylyǵyna tap bolyp otyr. Al avtoparkti jańartyp alǵandarǵa lızıngtik tólemderge aqsha jetpeıdi.

Jıyn barysynda partııalyqtar óńirlerdegi qoǵamdyq kólikpen baılanysty máselelerge de toqtaldy. Máselen, Jezqazǵanda «Bekbolatsaı» shaǵynaýdanynyń 3 myń turǵyny avtobýs qatynasysyz qalǵan. Qyzylorda turǵyndary avtobýstardyń qatynaý kestesiniń óte yńǵaısyzdyǵyna shaǵymdanady. Munda ortalyq kóshelerde marshrýttar qaıtalansa, al shalǵaı aýdandarǵa qatynamaıdy.

Taǵy bir ózekti másele – belgilengen ostik júktemeden asatyn aýyr júk kólikteriniń jol tósemin merziminen buryn buzýy.

«Mańǵystaý oblysynyń Shetpe aýylynda eki jyl buryn jol jóndelip edi. Biraq karerlik samosvaldar sol joldardy typ-tıpyl etti. Endi ony qaıta jóndeý qajet, oǵan respýblıkalyq bıýdjetten taǵy 800 mln. teńge bólindi. Qazirgi ýaqytta elimizdegi joldardyń tek 9,3%-y bir oske 10 tonnadan astam aýyrlyqqa shydas bere alady. Osy máseleni sheshýge tıisti deńgeıde kóńil bólinbeı keledi», - dedi komıtet múshesi Dáýren Bıjumanov.

Nurotandyqtar tranzıttik avtojoldardyń sapasyna erekshe nazar aýdardy. Komıtette atap ótkendeı, Orynbor, Chelıabınsk, Qorǵan, Omby, Jańasibir baǵytyndaǵy avtojoldardyń basym bóligi zamanaýı standarttarǵa sáıkes kelmeıdi. Merdigerler jol salý jáne jóndeý kezinde ushyrasatyn problemalardyń biri – jol-qurylys materıaldarynyń qymbattaýy.

Joǵaryda aıtylǵandardy eskere otyryp, Komıtet Indýstrııa jáne ınfraqurylymdyq damý mınıstrligine joldardy ortasha jóndeý úshin tehnıkalyq qujattamanyń saraptamasyn akkredıttelgen uıymdarǵa berýdi, joldardy ortasha jóndeýdiń 1 shaqyrymyna jumsalatyn shyǵyndar lımıtin belgileýdi, sondaı-aq kelesi jyldyń 1 qańtaryna deıin barlyq avtojoldar jaı-kúıiniń biryńǵaı kartasyn jasaýdy usyndy.

Sonymen qatar, Partııalyq baqylaý komıteti jumysynda jibergen olqylyqtary úshin «QazAvtoJol» UK» AQ basqarma tóraǵasy Asqar Muratulyna «eskertý», Temirtaý qalasynyń ákimi Qaırat Begimovke, Mańǵystaý oblysynyń jolaýshylar kóligi jáne avtomobıl joldary basqarmasynyń basshysy Adaıbek Qalıevke «sógis» túrindegi partııalyq jaýapkershilikke tartý týraly qaýly shyǵardy.

Indýstrııa jáne ınfraqurylymdyq damý mınıstrine Avtomobıl joldary komıtetiniń tóraǵasy Tólegen Abdýllın men Kólik komıtetiniń tóraǵasy Samat Gılımovqa tártiptik jaza qoldaný usynyldy.

Pikirler