Bılım jäne ǧylym ministrlıgı sūranysqa sai kelmeitın 50 mamandyq boiynşa kolledjderge qabyldaudy toqtatty.
Vedomstvo tehnikalyq jäne käsıptık bılım beru (TjKB) mamandyqtary men bılıktılıkterınıŋ jaŋa synyptauyşyn äzırlep, bekıttı. Özgerıster kolledjderde oqytylatyn mamandyqtar eŋbek naryǧynyŋ qazırgı sūranystaryna säikes keluı üşın jasalǧan.
Endıgı kezekte oqu prosesıne sūranysqa ie mamandyqtar boiynşa jaŋa bılım beru baǧdarlamalary engızılıp jatyr.
Mäselen, qazaqstandyq kolledjderde synama ırıkteuşı, şam jasauşy, guverner, zaŋger-konsult jäne taǧy basqa mamandyqtar boiynşa qabyldau toqtatyldy.
Sondai-aq jıkteuşıden «Bılım beru ūiymynyŋ zerthanaşysy», «Patenttanu» jäne basqa da mamandyqtar alynyp tastaldy.
«Bızdıŋ basty maqsatymyz – bılım beru baǧdarlamalary men oqytylatyn mamandyqtardy jūmys beruşılerdıŋ zamanaui sūranystaryna säikestendıru bolyp tabylady. Sondyqtan bız ülken taldau jūmystaryn jürgızıp, eŋbek naryǧyna monitoring jürgızdık. Jūmys beruşılermen jäne salalyq qauymdastyqtardyŋ ökılderımen kezdestık. Olardyŋ ūsynystaryn eskere otyryp, mamandyqtar jıkteuışısın jaŋarttyq. Endı qazaqstandyq kolledjderde «Robototehnika jäne endırılgen jüieler», «Nanomaterialdar negızındegı būiymdar tehnologiiasy», «Öndırıstıŋ additivtı tehnologiialary», «Qaşyqtan basqarylatyn aviasiialyq jüie», «Ǧimarattardy jobalau men paidalanudyŋ avtomattandyrylǧan jüielerı», «Jylyjai şaruaşylyǧyn ūiymdastyru», «Grafikalyq jäne multimediialyq dizain», «Tas öŋdeu öndırısı», «Landşaftyq dizain», «Jyljymaityn mülıktı basqaru», «Destinasiiany basqaru», «Qūrylystaǧy smetalyq ıs», «Eŋbektı qorǧau jäne tehnologiialyq prosesterdıŋ qauıpsızdıgı» jäne basqa da jaŋa mamandyqtar oqytylady», – dep atap öttı QR BǦM Tehnikalyq jäne käsıptık bılım beru departamentınıŋ direktory Nasymjan Ospanova.
«Adyrna» ūlttyq portaly
