QR Dın ısterı jäne azamattyq qoǧam ministrı
N.B.Ermekbaev myrzaǧa
QR Mädeniet jäne sport minisrı
A.Mūhamediūly myrzaǧa
Aqmola oblysynyŋ äkımı
M.K.Myrzalin myrzaǧa
Kökşetaudaǧy Burabaida Abylai han otyrdy dep aŋyzdalatyn "Han taǧy" dep atalatyn eskertkıştı bärımız bılemız. Ondaǧy aqparattyq taqtaişada jazylǧan "Būl jer qūlşylyq jasaityn, tabynatyn, täuäp qylatyn jer emes" dep üş tılde jazuşylardyŋ jymysqy oiy da tüsınıktı. Baiaǧy serık qosu degen syltaumen qasiettı jerlerge jūrttyŋ baruyna tyiym salu ǧoi. Keşegı Maǧjan, Säkender jyrǧa qosqan, qūrmettegen tarihi orynǧa äsıre dınşıl keiıpke tüsken ūrpaǧynyŋ qarym-qatynasy osy bolyp tūr. Qazaq eskertkışke tabynbaidy, qūrmet körsetu arqyly tarihi jadyn jaŋǧyrtady, ruhani jaŋǧyru degenımız sol. Elbasynyŋ «Ruhani jaŋǧyru» baǧdarlamasy, onyŋ ışıdegı «Qasiettı Qazaqstan» kışı baǧdarlamasy osyndai tarihi oryndardy özımız tanyp qana qoimai, şetelderge tanystyru emes pe? Maǧlūmattyq taqtaişany qoiǧan memlekettık qyzmetkerler boluy mümkın. Eskertkışke qarapaiym kısı aqparattyq taqtaişa qoia almaidy ǧoi. Sonda memqyzmetkerler Elbasynyŋ «Ruhani jaŋǧyru» baǧdarlamasyna qarsy ma? Sonymen bırge memlekettık qyzmetkerler özderınıŋ dıni közqarastaryn qyzmette bıldırıp, qoldanuyna tyiym salatyn zaŋ şyqqan joq pa edı. Al "Han taǧyna" qyzyl X belısın qoiyp, eşqandai qisyny bolmasa da qaǧbanyŋ suretın qoiyp, kökpen qoldau √ belgısın ornatularyn qalai tüsınemız? Qazaqtyŋ eskertkışı kerek emes, odan da Mekkege bar /tabynu/ degen oidy megzep tūrǧandai. Siriiada, İrak, Auǧanstan tärızdı uahabizmnıŋ otanyna ainalǧan elderde eŋ äulelı däl osylai tarihi oryndar men jergılıktı halyqtyŋ töl mädenietın, dästürın joiu arqyly syrt küşter dıni ideologiialyq jūmystar jürgızgenı belgılı. «Adyrna» ūlttyq-etnografiialyq bırlestıgı öz jarǧysynda körsetılgendei qazaqtyŋ ūlttyq qūndylyqtaryn, mädeni-ruhani qūndylyqtaryn nasihattau jäne qorǧau maqsatynda osy hatty jazyp otyr.
Är mädeniettıŋ öz oryny bar. Būl jerde qaǧba suretı berıletın eş retı joq. Şeteldıkterdı qydyrtyp jürgen aǧamyz maǧlūmattyq taqtaişanyŋ qasynda qonaqtardyŋ aldynda jerge kırerdei qyzaryp ūialǧanyn jetkızdı. Özımızdı qoişy, şeteldıkter öz tarihyn tabanǧa salǧan el dep bızdı mazaq etıp ketetın şyǧar. Öz eskertkışterımızdı özımız qadırlemesek, özgeler qūrmetter dep qalai ümıttenesız?
QR Dın ısterı jäne azamattyq qoǧam ministrlıgı, QR Mädeniet jäne sport ministrlıgı jäne Aqmola oblysy äkımşılıgınen būl mäsele boiynşa qandai da bır şara qoldanady dep senım artamyz.
Arman ÄUBÄKIR,
"Adyrna" ūlttyq-etnografiialyq bırlestıgınıŋ direktory
