Üşınşı megapoliste memlekettık tıldı erkın meŋgergen etnos ökılderınıŋ qatary kün sanap artyp keledı. Būl sözımızge qalalyq ışkı saiasat jäne jastar ısterı jönındegı basqarmasyna qarasty «Qoǧamdyq kelısım» mekemesınıŋ ūiymdastyruymen alǧaş ret ötken respublikalyq «Myŋ jüirık» aǧartuşylyq jobasy naqty dälel bola alady. Körme ortalyǧynda Täuelsızdıktıŋ 30 jyldyǧy aiasynda 1 jeltoqsan – QR Tūŋǧyş Prezidentı künıne orai ūiymdastyrylǧan etnos balalary arasynda qazaq tılın ılgerıletuge arnalǧan baiqaudyŋ jeŋımpazdary marapattaldy.
Saltanatty jiynǧa qatysqan qala äkımınıŋ bırınşı orynbasary, qalalyq QHA töraǧasynyŋ orynbasary Şyŋǧys Mūqan qazaq ertegılerı men adamzat örkenietınde jarqyn ız qaldyrǧan tūlǧalardy tanyp-bıluge, jastaiynan käsıp taŋdauǧa jäne özı tuyp-ösken ölkesın qazaq tılınde tanystyruǧa ūmtylǧan balalardy marapattady. Ş.Jūmabekūly jinalǧandardy 1 jeltoqsan – QR Tūŋǧyş Prezidentı künımen qūttyqtap, baiqaudyŋ maŋyzyna toqtaldy.
– Memlekettık tıl – halyqtardyŋ bır-bırımen yntymaqtasatyn, söz bailasatyn, tüsınısetın, tabysatyn, tatulasatyn qarym-qatynas qūraly. Memlekettık tıldı bılu – barşaǧa mındet. Tıldıŋ maŋyzyn arttyryp qana qoimai, ony öskeleŋ ūrpaqtyŋ boiyna darytuǧa ärqaisymyz atsalysuymyz kerek. Būl – ortaq mındetımız. Bala jastan tıldı üiretudıŋ de maŋyzy joǧary, - dedı Şyŋǧys Jūmabekūly.Al qazylar alqasynyŋ töraǧasy, Oŋtüstık Qazaqstan memlekettık pedagogikalyq universitetı «Ruhani jaŋǧyru jäne tärbie» bölımınıŋ basşysy, tarih ǧylymdarynyŋ kandidaty Qairat Anarbaev baiqau äleumettık jelılerde onlain-formatta ötkızılgenın mälımdedı. Qazaq tılın meŋgeruge arnalǧan aǧartuşylyq jobaǧa respublika aumaǧynda tūratyn 300-ge juyq etnos balalary qatysyp, erejede körsetılgen talaptarǧa sai 4 baǧyt boiynşa öz önerlerın beinerolik arqyly ūsynǧan. Qazylar alqasynyŋ töraǧasy Q.Saparhanūly qatysuşy ümıtkerlerdıŋ önerın jan-jaqty saraptai kele, olardyŋ ışınen erejege säikes 10 balany taŋdaǧanyn aitady. Atap aitqanda, ūiǧyr etnosynyŋ ökılı Mehriai Abdullaeva (Almaty qalasy), äzırbaijan etnosynyŋ ökılı Azat Ramisūly (Türkıstan oblysy), maŋǧystaulyq orys etnosy ökılı Eva Djoeva, ukrain etnosynan Emil Kovalenko (Şymkent), qyzylordalyq Ameliia Pak (korei etnosy), tarazdyq türık qyzy Elzara Halilova, şymkenttık balaqai Temurbek Halmūrat, arab etnosynyŋ ökılı Ahmed Şavki (Şymkent), pavlodarlyq nemıs ūltynyŋ ökılı Evgenii Şlitter, şymkenttık tatar etnosynyŋ jas ökılı Nail Iýskaev jäne olardyŋ jetekşılerı marapat törınen körındı. Olarǧa arnaiy diplomdar men syi-siiapattar tabystaldy.
