«Alataý» dástúrli óner teatry Ystambulda

750

Qazaqstan men Túrkııa memleketteri arasyndaǵy mádenı baılanystardyń bir tarmaǵy – teatr jáne mýzyka óneri salasyndaǵy qarym-qatynastar. Týystas eki eldiń mádenı qarym-katynastarynda dástúrli mádenıet úlgilerin jańǵyrtýdyń da mańyzy erekshe. Bul eki eldiń tól mádenıeti boıynsha qandaı erekshelikteri pen uqsastyqtarynyń bar ekenin tanytatyn úlgi.

Almaty qalasynyń ákimdigi, Almaty qalasynyń ákimdigine qarasty Almaty qalasy mádenıet basqarmasy, Qazaqstan Respýblıkasynyń Túrkııa Respýblıkasyndaǵy elshiligi, Ystambul qalasy ákimdigi jáne Almaty qalasy mádenıet basqarmasyna qarasty «Alataý» dástúrli óner teatrynyń uıymdastyrýymen Qazaqstannyń Táýelsizdiginiń 30 jyldyǵyna oraı ulttyq ónerimizdi tanytý, ulttyq biregeılikti dáripteý maqsatynda 2021 jyldyń 25 qarasha kúni Túrkııanyń Ystambul qalasynda Djemal Reshıt Reı Konser Salonýnda «Altybaqan» oıyn-saýyq án keshi ótti. Ultymyzdyń maqtanysh eter asyl murasy, rýhanı jádigerleri ishinde umyt bolyp bara jatqan qazaqtyń turmys-saltqa baǵyttalǵan «Altybaqan» ulttyq oıyny – qazaq jastarynyń erteden kele jatqan keshkilik bas qosyp, án aıtyp, dombyra tartyp, aıtys jasap, bı bılep, túrli oıyndar oınap, kóńil kóterip, oıyn-saýyq quratyn keshi. Osy ulttyq oıynnyń tóńireginde áýeletken dástúrli án men kúmbirlgen kúı, bılerimiz bir birimen astasyp, oıyn-saýyq án keshi usynyldy. Án keshine Qazaqstan Respýblıkasynyń Túrkııadaǵy Tótenshe jáne Ókiletti Elshisi Abzal Saparbekuly arnaıy kelip, quttyqtaý sózin aıtty. Sondaı-aq baýyrlas túrik elinde bilim alyp júrgen otandastarymyz, túrkııalyqtar jáne t.b. boı kórsetti. Qazaqstan Respýblıkasynyń Túrkııadaǵy Tótenshe jáne Ókiletti Elshisi Abzal Saparbekuly, túrik jáne ázerbaıjandyq óner sańlaqtary jáne kórermender ónerpazdarymyzdyń talanttaryna tánti bolyp, ulttyq ónerimizdiń órkendeı berýine demeý kórsetken Almaty qalasynyń ákimi Baqytjan Ábdiruly Saǵyntaevqa, ónerpazadarymyzǵa alǵystaryn aıtyp, jyly lebizderin bildirdi. Teatr dırektory – Rınat Zaıtov, Kórkemdik jetekshisi – Juldyzbek Jumanbaı.


Qazaqstannyń Tuńǵysh Prezıdenti – Elbasy N. Á. Nazarbaev óziniń «Uly dalanyń jeti qyry» atty maqalasynda «Aýyzsha jáne mýzykalyq dástúrdi jańǵyrtý qazirgi zamanǵy aýdıtorııaǵa jaqyn ári túsinikti formatta bolýy kerek», – dep atap kórsetken bolatyn. Rýhanı qundylyqtardyń túpki máni ulttyq óner ekeni belgili. Bul adamdardyń rýhanı qajettilikterin qanaǵattandyrady. Qazaq halqynyń ulttyq dástúrli óneri – máńgilik óshpeıtin ómirsheń qazyna. Kúlli álemge maqtanyshpen kórsete alatyn sımvolymyz. Tól ónerimizdi órge súırep, barynsha nasıhattaý – barshamyzdyń paryzymyz. Padısha dástúrli án ónerimiz qanatyn keńge jaıyp, uly dala rýhy asqaqtaı bergeı!

Qýanysh Jumabekuly
PhD doktory,
«Alataý» dástúrli óner teatry Ádebıet bóliminiń basshysy

Pikirler
Redakııa tańdaýy