Şymkentte jasy 18-den asqan mügedektıgı bar jandarǧa arnalǧan ortalyqtyŋ resmi aşylu saltanaty boldy. «Raqmet, saǧan, Anaşym» ortalyǧynyŋ jetekşılerı men jasöspırımder qonaqtarǧa dastarhan jaiyp, öz önerlerın körsettı. Is-şaraǧa «Şymkent qalasynyŋ Azamattyq Aliansynyŋ» töraǧasy Jūmaǧali Bılısbekov, türlı qoǧamdyq ūiymdardyŋ jetekşılerı, änşı Zattybek Köpbolsynūly, jetkınşekter men olardyŋ ata-analary qatysty.
– Erekşe kütımdı qajet etetın balalar qoǧamǧa etene aralasuy kerek. Basqa da jerlesterımız osyndai ortalyqtardyŋ bar ekenın bıluı baǧytyndaǧy jūmystaryŋyzǧa Azamattyq Alians tarapynan qoldau körsetemız. Ortalyq jūmysyna tek sättılık, al ata-analarǧa tözımdılık pen densaulyq tıleimız! – dedı Jūmaǧali Däuletbekūly.«Raqmet, saǧan, Anaşym» qoǧamdyq qorynyŋ töraiymy Kenjetaeva Almagüldıŋ aituynşa, qor 2017 jyldan berı jūmys ıstep keledı. Al jaqynda qalalyq äkımdıktıŋ, demeuşıler men qamqor jandardyŋ qoldauymen osy ǧimarat jöndelgen. Ortalyq jasy 18-den asqan 12 adamǧa laiyqtalǧan. Trenajer qūraldary men demalatyn bölmelerı bar. Mümkındıgı şekteulı jandardy ata-analary ortalyqqa taŋerteŋ alyp kelıp, keşke alyp qaitady. Mūndai jandar ortalyqqa Jūmyspen qamtu jäne äleumettık baǧdarlamalar basqarmasynyŋ joldamasymen keledı.
