Öz basym saiasatker nemese memleket qairatkerı emespın. Tek qana qazaq önerınıŋ sapynda jürgen-qatardaǧy jauyngermın.
Eŋ bastysy - Qazaqstan degen ūly memlekettıŋ tolyq qandy azamatymyn! Eger men QR-nyŋ tolyq qandy azamaty bolǧanym ras bolsa, iaǧni men öz elım men öz jerımde kökeiımde jürgen oiymdy ortaǧa saluǧa tolyq qūqyǧym bar dep esepteimın!
Osyndai maǧan el men jerdı, memlekettı näsıp etken jaratuşyǧa san myŋ şükırşılıkter aitamyn!
Demek, qazırgı qaǧaz betıne tüsırıp otyrǧan oiym üşın menı eşkım synap-mınei qoimas degen oidamyn…
Qūdaiǧa şükır, egemen el bolyp, qazaq elınıŋ kök bairaǧynyŋ kökte jelbıregenıne de 30 jyl bolyp jatyr. Kelıp jetken täuelsızdıktıŋ arqasynda qandai tūrǧyda bolmasyn közımızdıŋ aşylǧany ras! Köptegen düniege de qol jetkenı taǧy bar.
Desek te… 30 jylda elımızde älı de bolsa öz şeşımın tappaǧan köptegen mäselelerdıŋ baryn el-jūrt jaqsy bıledı jäne sol üşın alaŋdaidy! Ol - qazaq jerındegı jer-su attary. Menıŋ aitpaǧym, alysqa barmai-aq menıŋ tuyp ösken mekenım - Narynqol audanymen qoltyqtas jatqan Ūiǧyr audany!…
(P.S. Aita bersek kelmeske ketken Keŋes odaǧynan qalǧan köptegen ataular bar ǧoi…)
Sonymen, nege ol - ūiǧyr audany?…
Bılem! Ol jerdı mekendeitın eldıŋ ortasynda ūiǧyr ūltynyŋ bar ekenın.
Bılem! Ūiǧyr aǧaiynnyŋ qazaq bauyrlarǧa yqylasynyŋ joǧary ekenın.
Bılem! QR-nyŋ köp ūltty, tūtas memleket ekenın.
Bılem! Bärımızdıŋ iısı bır - mūsylman ekenımızdı.
Bılmeitın jäne tüsınbeitın bır närsem bar… Nege ol - ūiǧyr audany?…
Men būl oiymmen ūltarazdyq tüsınıspeuşılık tuǧyzaiyn dep otyrǧan joqpyn. Nemese, ūiǧyr aǧaiyndardy şettep jatqan joqpyn. Ömır sürsın, örkendesın. Niettes bauyrmyz ǧoi.
Aitpaǧym, osy audannyŋ atauyn özgertu jönınde būrynnan berı aqyly asqan aǧa-apalarymyz ben saiasatker, qoǧam jäne memleket qairatkerlerı de köptegen ūsynystar jasady. Bıraq… ol Memleket basynda otyrǧan arqa süier aǧa-apalarymnyŋ qūlaǧyna jetse de, osyǧan nazar audarmauy menı ǧana emes, köpşılıktı alaŋdatatyny ras!
Nege būl mäsele älı künge deiın öz şeşımın taba almai otyr?..
Qūdaiǧa şükır, auyzyn aiǧa bılegen ūly el ekenımız ras qoi!
Täuelsızdıgımızdı törtkül düniege moiyndatqanymyz ras qoi!
Qazaqstan elı tūǧyry biık täuelsız ekenı ras qoi!
Täuelsızdıgımızge 30 jyl tolǧany ras qoi!
Şynymen osynyŋ bärı ras bolsa, qazaq jerındegı Ūiǧyr audany atauyn qazaqşaǧa auystyruǧa ne kedergı?…
Osynyŋ bärı ras bolsa, neden nemese nege bız jaltaqtaimyz?!!!…
Tüsınbeimın!…
(P.S. Mümkın menıŋ mi-aqylym älı pıspegen bolar…)
Atalarymyzdan qalǧan jaqsy söz bar!
«Özıŋe-özıŋ myqty bol, qoŋsyŋdy (körşıŋdı) ūry tūtpa!!!»
"Adyrna" ūlttyq portaly
