Q.Toqaev: Täuelsızdık ūrpaqtary - jaŋa Qazaqstannyŋ basty simvoldarynyŋ bırı

Täuelsızdık ūrpaqtary - jaŋa Qazaqstannyŋ basty simvoldarynyŋ bırı. Būl turaly bügın Aqordada «Täuelsızdık qūrdastary» grantyn saltanatty tabystau şarasynda Memleket basşysy Qasym-Jomart Toqaev aitty. «Qūrmettı jastar! Barşaŋyzdy kele jatqan ūly meiram - Täuelsızdık künımen şyn jürekten qūttyqtaimyn. Bügıngı kezdesuımızdıŋ erekşe män-maŋyzy bar. Täuelsızdık ūrpaqtary - şyn mänınde jaŋa Qazaqstannyŋ basty simvoldarynyŋ bırı. Elımız derbes memleket bolǧannan berı oiy erkın, ruhy azat tūtas buyn ösıp jetıldı. Täuelsızdık perzentterınıŋ aldyŋǧy tolqyny er jetıp, el ısıne aralasa bastady. Olar Otanymyzdyŋ ösıp-örkendeuıne öz ülesın qosyp kele jatyr», - dep atap öttı Memleket basşysy. Qasym-Jomart Toqaev egemendık kezeŋınde tuyp ösken jastarymyzǧa arnauly grant berudı tapsyrǧanyn atap öttı. «Būl - talanty ūl-qyzdarymyzdyŋ bastamalaryn qoldau üşın jasalǧan qadam. Qazaqta «jas kelse ıske» degen jaqsy söz bar. Halqymyz jastarǧa ärdaiym senım artyp, erekşe ümıt kütken. Ūrpaqtyŋ tärbiesıne, bılımdı, bılıktı boluyna airyqşa den qoiady. Daryndy jastarymyz elımızdıŋ bolaşaǧyna degen senımdı nyǧaita tüsedı. Olardyŋ tuǧan elge qyzmet etuge qūlşynysy quantady. Men grant jeŋımpazdary ūsynǧan jobalarmen tanysyp şyqtym. Būl jobalardyŋ köpşılıgınde ekologiiaǧa basa män berılgenın baiqadym. Būl öte dūrys. Öitkenı, qorşaǧan ortany qorǧau qazır barşa azamat üşın asa maŋyzdy mäsele. Keŋ baitaq jerımızdıŋ bıregei tabiǧatyn saqtau bärımızdıŋ qasiettı boryşymyz. Jastardyŋ tyŋ ideialary naqty jüzege asyp, halyqtyŋ igılıgıne ainalady dep senemın. Şyn mänınde būl elımızdıŋ mereitoiyna Täuelsızdık ūrpaqtarynyŋ tartuy bolmaq», - dedı QR Prezidentı.