Auyl şaruaşylyǧy ministrı Erbol Qaraşökeev maŋǧystaulyq fermerlerdıŋ talabyna jauap berdı, dep habarlaidy “Adyrna” ūlttyq portaly.
Būǧan deiın KTK arnasy fermerlerdıŋ auyl şaruaşylyǧy ministrlıgıne aiaq astynan barǧanyn habarlaǧan. Şeneunıkterge kezdesu ūiymdastyruǧa tura keldı. Sol jerde Maŋǧystau oblysynan kelgen Ädılbek Saǧyndyqov auyl şaruaşylyǧy ministrı otstavkaǧa ketuı kerek dep mälımdedı.
"Sız renjımeŋız, bıraq Maŋǧystaudyŋ halqy sızge ökpelı, jūmysyŋyzǧa köŋılı tolmai otyr. Aimaǧymyzǧa qoldau qajet. Qystyŋ aiaqtaluyna ekı ai qaldy. Odan aman şyǧuymyz ekıtalai. Byltyrmen salystyrǧanda Maŋǧystauda maldyŋ törtten bır bölıgı ǧana qaldy. Qalǧany qyryldy nemese Aqtöbe men Oralǧa satylyp kettı", - deidı fermer.
Ortalyq kommunikasiialyq qyzmetınde ötken baspasöz mäslihatynda ministr Erbol Qaraşökeev jurnalisterge sūhbat berıp, fermerlermen tört saǧat boiy jinalys ötkızgenın aitty. Sol jerde qoldau şaralary talqylandy.
"Men - ükımet müşesımen. Soǧan qaramastan, menı taǧaiyndau nemese otstavkaǧa jıberu turaly şeşımdı memleket basşysy qabyldaidy", – deidı ministr.Aita keterı, auyl şaruaşylyǧy ministrlıgıne barǧan fermerler qūrǧaqşylyqtan keiıngı memleket tarapynan jasalyp jatqan qoldau şaralaryna narazy. Olar qyrylǧan maldy qaita sanaudy talap etıp otyr. Sebebı aimaqta 1 700 bastan artyq mal qyryldy. Maŋǧystau oblysynda şöptıŋ baǧasy da şaryqtap kettı. Olai jalǧasa berse, qalǧan mal qyrylyp qalady. Şarualar baǧany tezdetıp tömendetudı sūraidy. Biyl qatty qūrǧaqşylyqtan keiın myŋdaǧan mal qyryldy. Halyqtyŋ narazylyǧy küşeiıp kettı. Şarualar öz küşımen bır-bırıne kömektese bastady. Şöptı basqa aimaqtardan jıberdı. Osydan keiın memleket basşysy Qasym-Jomart Toqaev eks-ministr Saparhan Omarovqa otstavkaǧa ketuge keŋes berdı. Erbol Qaraşökeev auyl şaruaşylyǧy ministrı qyzmetıne 1 qyrküiekte taǧaiyndalǧan bolatyn.
”Adyrna” ūlttyq portaly
